Chinram ah H1N1 Zawtnak a Ngeimi an Um Rih Lo| Video

| The Chin Journal | Hakha, Chin State

Atulio Myanmar ram ah a cangmi H1N1 tlangrai zawtnak in mithi an hun karh chin thluahmang bantuk in kan Chinram ah H1N1 zawtnak a um le um lo le zeitindah khenkhamnak lei tuanvo an lakmi timi kong he pehtlai in The Chin Journal nih Pu Van Tin Uk biaruahnak kan ngei.

Pu Van Tin Uk cu Hakha peng, zawtnak khenkhamnak lei ngandamnak zung ah Health Assistant a tuan liomi a si.

“Baipi khun in Yangon le Mandalay lei in zawt buin Laitlang ah a rak tlungmi pawl hi checknak kan tuah hna. Nizan zong ah khan minung thlidawp lam ah zawtnak rungrul luh (SARI) ruang ah a zawmi minung pathum kan check hna. H1N1 zawtnak le SARI zawtnak aa pehtlaihnak a um hnga maw tiin kan checkmi a si. Cu minung 3 cu H1N1 zawtnak an ngei lo,” tiah Pu Van Tin Uk nih a chim.

H1N1 zawtnak khenkhamnak ca ah Khrihfabu hna le sianginn pawl ah fimchimhnak zong kan tuah, tiah a chim chap.

“Myanmar ah zawtnak a tlunka khan Naypyidaw lei in khenkhamnak rian tuan ding in ca a rak kan kuat. Abiapi bik cu fimchimhnak catlap pawl kha Laica in ka leh i kan chuah. Ramkulh ngandamnak zung ca lei riantuannak he hnaltaknak ngeih hnu ah kan chuah. Poster pawl zong runvennak ca ah ahlanken in kan chuah hna,” tiah a chim.

Laitlang chung sianginn 80 hrawng zong ah H1N1 kong fimchimhnak an tuah cang i hmailei zong ah mipi he ton i fimchimhnak tuah ding in timhtuahnak an ngei.

Atulio Myanmar ram ah a cangmi H1N1 zawtnak in Minung 60 leng an nunnak a liam cang.

H1N1 Zawtnak Sining le i Kham Ning

H1N1 hi a cang tawnmi tlangrai zawtnak phun he an i langh ning aa khat, tiah siibawite nih an langhter.

Vok in aa thawkmi zawtnak a si ko nain voksa hmin tein chuanmi ei tik ah zawtnak i lak khawh a si hlei lo. Minung le minung karlak i chawnhmi zawtnak tu a si.

A cang tawnmi tlangrai he an i langh ning aa khat pah ko nain H1N1 zawtnak tu cu hrom fah, chungtlik le luakluak tibantuk fahnak pawl aa kawp chih.

H1N1 Zawtnak Muisam-

  • Khuasih
  • Khuhkhuh
  • Thadih, uai hninghnaing in um
  • Chungtlik
  • Taklinh
  • Lufah le taksa fah
  • Hrom fah
  • Hnapchuah hnarpih
  • Lungmih i luakluak ti bantuk hna hi an si.

H1N1 zawtnak a ngeimi nih an khuh an khuh tikah thli lak ah zawtnak rungrul a chuak. Cu zawtnak rungrul aa telmi thli cu i dawp sual ah cun i chawnh khawh a si.

I dawp sual lawng si loin zawtnak rungrul kha hmai ah a taang i mit, hnar, kaa chung ah a luh ahcun i chawnh khawh thotho a si.

Minung takpum chung ah luh loin takvun cung lenglei ah cun H1N1 zawtnak rungrul hi caan sau a nung kho lo.

Zawtnak rungrul a ngeimi kut tlaih, cil i tonghtham sual tikah cu kan tonghthamnak kut cun kan mit hna kan i hnuai ahcun i chawnh khawh a si.

Zawtnak i chawnh sual ahcun innchung ah i erh, na kut i tawl zungzal, khuhkhuh lo le hnaphnit lo ding i zuam, thianghlim tein um, na kut in na kaa le na mit tawngtham tuk hlah, mi an tam tuknak ah a herh lo ah vung kal len hlah (Na chawnh hna lai), thazaang um ding in rawl tha tein ei, i din, cun, atulio cu H1N1 a um lio a si caah lengchuah tikah zawtnak a ngeimi he ngei lomi he hmaihuh i huh ah a tha bik.

Latest News