Chinram ah a Lut Tharmi UDP Party in aa Cuh Dingmi Saya Tun Tun Lian Biaruahnak

| The Chin Journal | Hakha, Chin State

2020 Myanmar rampi Thimnak ah Chin ramkulh ah i zuam ve ding in ramkhel party thar pakhat a phanmi a um i Chinmi chung in palai pawl zong an thim dih cang.

Hi Party hi United Democratic Party (UDP) tiah theihmi a si i, 2007 ah Kachin pa U Zakhun Lung Sawng hruainak in an rak dirhmi ramkhel party a si. Atulio zong ah Kachin pa U Zakhun Lung Sawng nih Chairman a tlaih lio a si.

UDP nih abiapi in an i tinhmi le an i hmaithlakmi cu Myanmar rampi hi Federal Union ah dirh ding timi hi a si.

UDP party hi 2020 thimnak ah Kawlram hmun kip ah i cuh ding in an i tim i aa cuh dingmi palai 1,135 an ngei hna. Chin ramkulh peng kip zong ah i cuh ding in timhtuahnak an ngei.

Hakha peng ah Pyituh Hluttaw hmunhma ah aa cuh dingmi ca ah saya Tun Tun Lian (Zokhua) hi UDP nih an thim.

Saya Tun Tun Lian hi Middle School saya kum 10 a rak ttuan pin ah  M.Th Baibal degree a lak hnu ah Pastor zong a rak ttuan balmi a si.

Saya Tun Tun Lian nih, “UDP hi 2007 ah Canada ram ah U Zakhun Lung Sawng hruainak in aiawhtu minung 150 nih an rak dirhmi a si i, timhmi pasarih kan ngei. UDP nih aa tinhmi lak ah a pakhatnak bik cu kan ram hi Federal Union ah ser hi a si,”  tiah a chim.

“Mi nih UDP hi party tenau, thingkar lungkar chuak ah a kan rel. Cucu an theih lo caah a si. Kawlram chung peng 330 ah kan i zuam lai. Palai zong 1,135 tiang kan um i Kawlram huap piin a cawlcangmi kan si. Kan Laitlang zong peng pakua ning tein tlamtling tein i zuam khawh ding in kan i tim,” tiah a chim chap.

Atutan thimnak ah Chin ramkulh ah Party 12 an i zuam lai. Aa zuam dingmi palai minung 210 an um i cu chung ah independent in aa zuam dingmi milu 16 an si, tiah thawng kan theih.

Theihternak: 2020 Thimnak ah Laitlang ah aa cuh dingmi palai pawl The Chin Journal nih pumpak in biaruahnak pehzul in kan ngeih cuahmah hna. An konglam le an Party kong theih na duh cun The Chin Journal hin ka leng tawn.

Latest News

News in Burmese