Chinholh a Tlau Dengmi Phun 6 Kilven Awkah Dr. Kennet Van Bik Nih Hlathlainak Tuah Lai

| The Chin Journal | Hakha, Chin State

Chin miphun nih kan hmanmi holh hna lak ah a tlau deng cangmi (Asiloah) a tlau sual lai tiah phan ding dirhmun ah a ummi holh phun 6 kilven awkah Dr. Kenneth Van Bik hruainak in tu thla thawk in hlathlainak an tuah lai, tiah theih a si.

Dr. Kenneth Van Bik cu Rev. Dr. Van Bik fapa a si i, 2006 ah US ram i University of California, Berkeley in caholh lei (Linguistics) in Ph.D. a hmumi a si.

Dr. Kenneth Van Bik cu California State University, Fullerton ah Assistant Professor of Linguistics rian a tuan liomi zong a si i, Chinholh phun 6 kong hlatlainak ah Dartmouth College ah Associate Professor a simi David Peterson he an i bawm lai.

Chinholh phun 6 hlathlainak tuah ding in an thimmi hna cu: Tapong, Vanha, Lamtuk, Sakta, Mkaang le Taungtha timi hna hi an si.

“Miphun fate chung in aa semmi thangthar mino hna nih anmah ngeihmi holh kha hmang loin kiangkap miphun ngan deuh holh tu kha an hun hman deuh tik ah anmah nuhrin holh cu lohtlau lam a panh i, tihnung dirhmun ah a um ti khawh a si,” tiah Dr. Kenneth Van Bik nih a langhter.

Dr. Kenneth Van Bik le professor David Peterson nih hlathlainak an tuahmi Chinholh phun 6 kong cu “Pacific and Regional Archive for Digital Sources in Endangered Cultures” (PARADISEC) timi nih him tein a fim lai, tiah theih a si.

Source: OCREGISTER

Latest News