China Nih Arctic Rili ah Tichungkal Tilawng a Phakter Cun a Poi Lai Tiah US Nih Ralrin Pek

| The Chin Journal | Hakha, Chin State

Arctic Rili ah China nih ral thazaang lei in hmunkhuar ding in timhtuahnak a ngeih ca ah Arctic Rili kiangkap a ummi ram hna nih i ralrin a herh cang, tiah US rampi rungvengtu ralkap zung Pentagon nih May 2 a report a chuah.

Arctic Countries tiah theihmi Arctic Rili kiangkap hmunram ah a ummi ram hna cu Canada, US, Russia, Finland, Sweden, Norway, Denmark le Island ram 8 hna hi an si i, China hi aa tel lo.

Sihmanhsehlaw, 2013 thawk khan Arctic Rilikam ram hna tonpumhnak kip ah China cu khual dirhmun in kainak nawl pek a rak si.

June 2018 ah khan China nih Arctic Policy timi cathluan a rak chuah i Arctic Rili hmunhma ah hin China nih rili cung khualtlawnnak lampi zalong tein on a duh tiah an ruahdamh.

Cuti China nih tuah a duhnak aruang bik cu US le a hawile ram pawl i nuclear ralhriam dohkalh khawh nakding bik ah timhtuahnak a ngeih caah a si tiah Pentagon nih a lunghrinh.

Denmark penmi Greenland ah hin China nih Research Station le Satellite Ground ser ding in duhnak a ngei, tiah Denmark zong nih a lungretheihnak a langhter.

Greenland ah China nih Research Station le Satellite Ground a ser a si ahcun China ralkap pawl kha Arctic Rili ah an rak luh a hau lai.

Duhsah duhsah in China ralkap pawl cu nuclear ralhriam tarhmi tichungkal tilawng (Submarine) hmang in Arctic Rili ah hmun an khuar lai tiah an thin a phan hi a si.

Atulio ah China nih nuclear ralhriam tarhmi tichungkal tilawng paruk, Nuclear thazaang hmang Ballistic Missile tarhmi tichungkal tilawng pali (Jin-Class Submarine) le a dang raldohnak tichungkal tilawng sawhsawh 50 hrawng aa ngaih tiah US nih a zumh.

Arctic Rilipi ah nitlaklei ram hna i nuclear ralhriam dohkalh khawh nakding ah China nih a tlawmbik Jin-Class Submarine panga hi a hman a herh lai tiah an ruahdamh.

Cun, China zong nih atu ah Jin-Class Submarine a thar paruk a serchuah chap cang tiah Pentagon report nih a langhter.

China nih Arctic Rili ah hmunkhuar ding in duhnak le timhtuahnak a ngei tiah ti a si lio ah US le a hawile ram hna zong nih East Asia hmunram pawl ah tichungkal tilawng hmang in an hmunhma an kauh chin thlauhmah ve, tiah theih a si.

-Reuters

Latest News