Chin-Sagiang Ramri Kong Khampat le Yazakyu Tonpumhnak ah Mipi Tam U an Lungtling| Vuanci Mang Hen Dal

| The Chin Journal | Hakha, Chin State

Chin ramkulh le Sagaing ramthen ramri tung pawl ahlan ning in a thar in phun tthannak kong he pehtlai in Kalay peng, Khampat khua ah le Yazakyu khua ah mipi he tonpumhnak tuah a si cang i cu tonpumhnak ah cun mi tam u nih cun an lung a tling ko, tiah Chin ramkulh thingram lei vuanci Mang Hen Dal nih a chim.

October 7 ah khan Chin-Sagaing ramri tung ahlan ning in phun tthannak kong ah Khampat mipi le Chin ramkulh cozah ttuanvo ngeitu le Sagaing ramtthen cozah ttuanvo ngeitu karlak tonnak an rak tuah.

Cun, October 8 ah Kalay peng, Yazakyu khua ah cu he pehtlai cun mipi he tonpumhnak an ngei tthan i voi hnih tonpumhnak an tuahnak ah mipi tam u nih cun an lung a tling ko, tiah vuanci Mang Hen Dal nih a langhter.

“October 7, Khampat mipi he tonpumhnak le October 8 i Yanzakyu ah tuahmi tonpumhnak ah cun mipi tam u nih ramri tung ahlan ning in phun tthan kong ah an lung a tling ko…mipi nih an lung a tlin ko a si ahcun cunglei ah kan chimhchawnh chap hna lai i, pehzul in kan ttuan lai,” tiah a chim.

Atulio an tawlrel cuahmahmi Chin-Sagaing ramri cu hlanlio Mirang chan 1935-1938 karlak ah an rak phunmi ramri tung in a thar in phun awk ah timhtuah a si i 1942 ah an chuahmi ramri Map/mepung cherhchanh in tawlrel an timh, tiah theih a si.

-CW

Latest News