Chin Ramkulh Le Rakhine Ramkulh ah Internet Phih Lo Ding US Nih Myanmar a Fial

| The Chin Journal | Hakha, Chin State

Kawl ralkap le AA hriamtlai an i kahnak Chin ramkulh, Peletwa peng le Rakhine ramkulh peng pakua ah internet line onpiak than ding in US nih Myanmar cozah a fial, tiah theih a si.

US ramleng vuanci zung biachimtu Morgan Ortagus nih, “Milu 1 million hrawng an umnak Rakhine le Chin State ah internet line ah phih ruang ah US lungrethei ngaiin a um ve,” tiah a chim.

Cucaah, Myanmar cozah nih internet line a phihmi onpiak than seh. Cuticun Rakhine ramchung ah Myanmar cozah riantuan ningcang vawleipi theih in pianghlang in hmuh khawh a si lai, tiah US nih a langhter.

Myanmar ramchung nuhrin covo kong he pehtlai in UN nih special palai ah a hmanmi Yanghee Lee nih, “Internet line an phihnak hmun pawl ah Kawl ralkap nih AA kahdohnak a tuah cuahmah. Internet line a pit i zeihmanh pianghlang in theih khawh a si lo tikah nuhrin covo buarnak pawl an tuah lai timi phannak a um,” tiah a chim ve.

Ortagus nih, “Internet line an on than lawnglawng ah hin kahdohnak a chuahnak hmun pawl ah Myanmar cozah nih hmaan te le dik tein rian a tuan le tuan lo hmuh khawh a si lai,” tiah a chim.

-Reuters

Latest News