Chin Ramkulh Kokek Rawhralnak Nih a Denmi Remhnak ah $8 Million Leng an Hman

| The Chin Journal | Hakha, Chin State

Chin ramkulh hmunkip ah a cangmi kokek rawhralnak ruang ah innlo a rawkmi le lamsul a rawkmi remhsiamnak ca ah $8.996 million kan hman, tiah Chin ramkulh cozah nih a langhter.

Chin ramkulh chung pum pawcawmnak tunmernak ca ah tiin Japan nih $10 million a hlutmi a um i cu chung in $8.996 million hi kokek hartong ca ah kan hman an ti hi a si.

Sipin vuanci U Soe Htet nih, “Khuate lei herhbaunak pawl ah an hman tiah kan theih. A tlawmbik khuate pathum ah a herhmi bawmhnak pek tiah ka theih. Kokek rawhralnak kong ah siseh, lam remhsiamnak kong ah siseh, Chin ramkulh huap in khuate pathum hi sersiam ding ti a si. Cu khuate pawl cu uktu lei nih an thim. Cun, ahlan project ah telh lomi khuate pathum zong thim chih a si lai tiin ka theih,” tiah a chim.

2015 lio i Chin ramkulh kokek rawhralnak ton lio ah a rawkralmi lam le innlo paw remhsiamnak ah Khuate Thanchonak zung nih ADB sin ah bawmhnak a hal i $10 million bawmhnak an pek hna hi a si.

Cu tangka chung in $8.996 million cu lam, donhlei, dinti, mei tibantuk sersiamnak ca ah an hman, tiah theih a si.

-Chin World (Salai Khup Khup)

Latest News