Chin Ram ah Nika Thazaang Hmang in Coffee Roternak Seh Hman Hram an Thok

| The Chin Journal | Hakha, Chin State

Nika thazaang hmang in coffee roternak seh Chin ramkulh, Mindat khua ah chiah a si cang.

Cu hlan ah coffee roter duh ahcun nitlaang ah pho a si tawn. Coffee rim vialte a lohtlau dih tawn caah coffee tha taktak a chuak kho tawn lo. Mah hlei ah nitlaang pho cu a caan zong a rua tuk. Cucaah atu bantuk in coffee roternak seh (solar dryer dome) kan hman hi a si tiah a ngeitu Salai Ma Hung nih a chim.

“Chin ram in a chuakmi coffee pawl hi quality tha ngai a si ko nain, coffee kan rak ttawh hmasat ka in kan pho ning system a hmaan lo ruang ah coffee tha taktak a chuak kho bal lo. 2016 thok in roternak  caah a dotdot in a ummi kan ser i kan hman. A cung kan khuh khawh lo ruang ah leidip an kai tawn. Fur caan a hun phak tik ah paa (mushroom) an kai tawn. Solar dryer dome kan hman a si ahcun ningcang deuh in kan roter khawh cang lai caah quality tha zong a chuak lai timi ruahchannak he solar dryer dome sehzung kan dirh hi a si” tiah Salai Ma Hung nih a  chim.

Hi sehzung dirhnak caah Denmark cozah sin in RBF (Responsible Business Fund) 80% an hmuh. Cun, a ngeitu lei nih 20% a thawh ve i cuticun sehzung an dirh hi a si.

Salai Ma Hung hi Chin ram chung ah ahmasabik coffee wine sertu a si. A sermi coffee wine cu hneksaknak an tuah cuahmah lio a si ruang ah sipuazi caah a hmang kho rih lo tiah theih a si.

– Khonumthung

Latest News