Chin Ralzam Siangngakchia Hna nih Sianginn Uniform le Cacawnnak Thilri Khulrang in an Herh

| The Chin Journal | Hakha, Chin State

Sami khua ah a phanmi Chin ralzam siangngakchia hna nih sianginn kainak uniform le cacawnnak thilri pawl khulrang in an herh, tiah Sami ralzam Camp ah a phan vemi Primary sayama Daw Khin Ma Win nih The Chin Journal ah a chim.

Sayama Khin Ma Win hi Paletwa peng Watma khuate ah Primary sayama a rak si i, AA le Kawl ralkap kahdohnak ruang ah Sami ah a rak zaam vemi a si. Sayama Khin Ma Win cu July 5 ah The Chin Journal nih Sami ralzam Camp ah kan vung ton i biaruahnak kan ngeih.​ Ralzam siangngakchia herhbaunak kong cu hitihin a chim.

“Atu tlawmpal ah sianginn kai si cang lai i kan fale ca ah sianginn uniform kan herh ngaingai. Kan khua ah ral a thawh caah kan uniform vialte kaltak in kan zaam hna. Zei hmanh i phorh loin zaam cio a si. Siangngakchia lawng si loim saya/mate zong nih sianginn uniform kan herh ko,” tiah a chim.

“Cun, ralzam siangngakchia pawl ca ah cauk, cafung, zal, cabuai le zaan cazoh tik ah van awk bettery rawn khawhmi mei pawl kan herh ngai.​ Sianginn kainak he pehtlai in a herhbaumi thilri vialte cu kan herh dih ko. Ral a hrang i kan zam caah kan thilri vialte cu kan kaltak dih. Cucaah, mibawmtu zatlangbu hna nih kan fale fimcawnnak ca ah a herhbaumi thilri pawl hi biapi ah chia in an kan bawmh khawh ahcun kan i lawm tuk ko hnga,” tiah Sayma Khin Ma Win nih a chim chap.

Atulio COVID-19 zawtnak ruang ah zing le chun tthen in sianginn a si lai lai caah ralzam siangngakchia pawl ca an thiam khawh nakhnga ralzam chung in Saya/mate nih alak tein tuition chimh kan i tim. Cu bantuk kan tuah khawh nakhnga mei le a dangdang kan herhmi thil zong tampi bawmh kan herh ko, tiah Sayama Khin Ma Win nih ralzam ngakchia 200 renglo fimcawnnak kong he pehtlai in a chim.

Latest News

News in Burmese