Chin Nungak Pakhat a Nunning Kong le Laitlang aa Dawhnak Kong Pawl Movie Thlak Ding in Director Zin Yaw Maung Maung Hakha a Rak Phan

| The Chin Journal | Hakha, Chin State

Chin nungak pakhat a nunning kong le Chin ram aa dawhnak kong pawl Movie thlak ding in Lemcang May Than Nuu vapa Director Zin Yaw Maung Maung, April 8 ah Hakha khua a rak phan i Movie thlaknak ding view pawl dothlatnak a rak tuah tiah Chin ram cozah chimnak nawl ngeitu Sipin Vuanci U Soe Htet nih a chim.

“Falam ah video thlaknak view pawl an zoh hnu ah Hakha a rak phan. Chin ram background pawl a thlak lai. Cu pawl cu cherhchan in ‘A Flower Above The Cloud’ (တိမ္ေတြေပၚကပန္း) timi Movie a thlak lai. Chin ram i a ummi nungak pakhat le Korea i a ummi minta pakhat kong video a si lai” tiah Minister U Soe Htet nih The Chin Journal ah a chim.

Hakha, Falam le Chin ram aa dawhnak pawl cherhchan in Movie thlak a si lai. Aa tel ding lemcang hna cu Actress May Than Nuu le Wat Mon Shwe Yi an si lai tiah a chim chap.

Chin ram i a ummi minthang thil pawl cherhchan in thlak a si lai i Chin nu pakhat nih Chin ngaktah pawl a zohkhenhmi hna le ca a cawntermi hna kong cherhchan in thlak a si lai.

“Chinmi chung in mi tampi an i tel lai, siangngakchia pawl zong an i tel lai. Cun, video chung ah hin Chinmi 75 i tel ve ding in request an tuah hna” tiah Minister U Soe Htet nih a chim.

Director Zin Yaw Maung Maung thlak dingmi Movie chung ah hin a cheu hi Chin ram chung ta a si lai i a dang tu cu Korea ah va kal in an i thla lai. Cun, an pehtonh hnu ah Myanmar le Korea holh in vawleicung theih in an phawtzamh te lai tiah theih a si.

Latest News

News in Burmese