Chin Nufa Yangon Khuapi Lamkam ah Kutdok in Caan Saupi Khua an Sa

| The Chin Journal | Hakha, Chin State

Yangon khuapi lamkam ah caan saupi kutdok in khua a sami Chin nufa hna hmanthlak cu naite ah khan Shwe Kyar timi mibawmtu zatlang phu nih online ah a hun langhter.

Hi fa khat ngei Chin nute hi Mai Sante tiah auhmi a si i, kum 19 a rak si lio in Yangon ah a phan i rawldawr ah rian a rak tuan.

Rawldawr rian a tuan lio ah Ba Yin timi pa he an i duh i an i thi-um. Sihmanhsehlaw, fa pakhat an ngeih hnu ah a vapa nih a kaltak.

Laitlang lei an chungkhar pawl phone number Mai Sante nih a rak i kenmi a um ko nain cu phoen cu a chungkhar nih an rak hmang ti lo i, a pehtlai kho ti hna lo.

Cuticun, a fate he Yangon khua i Theih Gyi Market pawng lamcung ah riak in atu thla tiang harsa ngaiin caan an hmang.

Shwe Kyar zatlang bu tuanvo ngeitu nu nih Mai Sante le a fapate bia a ruah hna lio

A fapate hi kum khat le thla thum a si cang. July 24 ah Shwe Kyar zatlangbu nih lamkam minung pawl ca ah alak in rawl an pek timi thawngpang an theih ve caah Mai Sante le a fate cu an vung i thawh ve.

Cuticun, Shwe Kyar nih nufa hna cu bia an ruah tik hna ah Mai Sante nih thil sining a chimh hna.

Mai Sante le a fate Laitlang an tlun khawh nakhnga Shwe Kyar bu nih Hakha Mann ah an vung thlah hna.

Bus Ticket zong an cawkpiak hna i lampi rawl einak ca ah tangka zong an rawnh hna. Nufa hna cu nihin zing ah kha Hakha lei ah Hakha Mann Bus in an i thawh cang, tiah theih a si.

Latest News