Chin Miphun Kong a Tawlrel Khotu Ramkhel Party kan Herh Hrimhrim: Pu David Ngai Sak

| The Chin Journal | Hakha, Chin State

Chin party pathum fonh in dirhmi CNLD party ah Chairman pakhat a simi sihni Pu David Ngai Sak nih Chin miphun kong a tawlrel khotu ramkhel party hi kan herh hrimhrim, tiah October 11 ah a langhter.

Pu David Ngai Sak nih Dal (1) nak tiin Chin miphun nih ramkhel party ttha kan herhnak kong cu number 10 tiang tthen in a langhter.

“Kan pal ciami tuanbia zoh tikah Chin miphun nih hin kanmah Chin miphun kong upavo pek in a tawlreltu Chin ramkhel party kan herh hrimhrim ko,” tiah a chim.

“Myanmar ramchung ah ramkhel party tampi an um ko nain Chin miphun kong he pehtlai in phunghram pawl serchuah ding in a tuanchuahtu ding party an um lo. Cucaah, Chin miphun ramkhel party hi kan herhnak a si,” tiah a langhter chap.

“Democracy zauk phung hi mi tam u a simi Kawl ca ah cun hlawknak nganpi a chuahpitu a si ko lai nain mi tlawm u miphun fa hna caah cun ttih a nungmi ramkhel system pakhat a si ve. (Abiana ah: Kawl phun vengtu upadi an serchuahnak le 1961 ah (Buddhism kha) rampi biaknak a si tiah upadi in an fehternak).”

“Cucaah, khahlan tlangcungmi hruaitu upa hna nih Democracy phung tang ah kan ton dingmi harnak pawl khenkham le runvennak caah Federal Union ser ding in Panglong hnatlaknak ah minsen an rak thut.”

“Mi tam u a simi miphun nih mi tlawmte a simi miphun kha a zungzal in an namneh in an chilhnanh nakhngalo Democracy System le Federal Union System hi aa rual tein kalpi tti a herh.”

“Myanmar ram ah Democracy hmu ding in kan ttuan hmasa lai i, cu hnu ah cun Federal Union kan dirh lai timi cu ahlan 1947 hrawng (Pha Sa Pa La chan) in atu tiang Kawl miphun in tlangcungmi mi tlawm u pawl thluakttawlnak phun ah an hmanmi hlenthawinak men a si ti hi Myanmar tuanbia ah kan hmuh khawh caah i ralrin ngaingai kan herh.”

“Federal Union kan dirh khawh lawng ah mitlawmte a simi miphun hna nih miphun ngan chilhnanhnak le namnehnak in kan i ven khawh lai i kan miphun kan khamh khawh lai.”

“Cucaah, CNLD nih miphun i rualrannak, mahte tawlrelnak nawl, Federal Union diktak dirhnak hi kan i hmaithlak i a dang tlangcung miphun hna he i bawm in ttuanchuah khawh kan i zuam cuahmah.”

“A pakhatnak bik ah Democracy hmuh ding in kan i zuam hmasa lai i a pahnihnak Federal Union kan dirh lai ti si loin a pakhat bik ah Federal Union kan dirh hmasa lai ti hi abiapi. Cun dih cun, a dang a pahnihnak, a pathumnak tibantuk pawl ttuancuah i zuam hi abiapi,” tiah Pu David Ngai Sak nih a chim.

Advertisement

Thawngpang Thar