Chin Minkeng Party Paoh He i Fonh Ding in Timhtuahnak Kan Ngei Ko: Pu Zo Zam

| The Chin Journal | Hakha, Chin State

Chin National League for Democracy (CNLD) Chairman Pu Zo Zam nih Myanmar ramchung ah a ummi Chin minkeng ramkhel party paoh he i fonh i rianttuan tti ding in timhtuahnak kan ngei ko, tiah January 4 ah a chim.

January 4, chun sml. 1:00 ah Yangon khua, Mayangone peng, Mitcaw Sianginn ah CNLD le Yangon khuasa Chin mipi tonnak an tuah i cuka hmun ah cun Pu Zo Zam nih atu bantuk hin a chim hi a si.

Tonnak ah a rak telmi Asho Chin lei upa pakhat nih, “CNLD hi Chinmi zapi aiawh nan ti ttung i Asho Chin hi i Party ah i fonh ding in ziah na kan sawm ve lo?” tiah biahalnak a tuah.

Pu Zo Zam nih, “Asho Chin milu hi kan tuak tik ah 500,000 hrawng an si. Cucaah, Asho Chin cu kan in bochan bikmi hna nan si tiah chim ka duh. Party i fonh kong ah rii pakhat kan chiahmi cu Chin min a kengmi zei bantuk party paohpaoh kanmah he i fonh ding in timhtuah a si ko. Cucaah, Asho Chin National Party (ACNP) zong hi kanmah he i fonh kho ding in pehzul in kan i zuam ko lai.

“Kanmah he fonh an duh le duh lo tu cu anmah cung ah aa hnget. Kannih nih cun Chin min a bumi ramkhel party dihlak he i fonh ding in timhtuah a si ko,” tiah a chim chap.

CNLD Chairman Pu No Than Kap zong nih, “CNLD hi Chinram i tlangcung party lawnglawng a si lo; Chinmi zapi kan i telnak Chin party si seh tiah kan duhmi a si. Chin party ahopaoh CNLD ah kan i tlum dih, kutka “kau piin kan on ko,” tiah a chim ve.

Latest News

News in Burmese