Change.Org ah Win le Zaw Ca Nawlnak Minsenthut Khawmhnak an Tuah

| The Chin Journal | Hakha, Chin State

Nudok-padok kong ah siseh, nauhrawhnak nawl kong ah siseh, atulio vawleicung mi hna nih nawlnak an tuah tik ah an hmanmi bikmi change.org ah Win le Zaw ca ah nawlnak minsenthut khawmhsuatnak tuah hram an thawk ve cang, tiah theih a si.

Minsenthut 5,000 hmuh ding in timhtuah a si i, atu ah minung 4,500 hrawng nih an min an khumh cang.

Hi min 5,000 khawmhmi hi Thai siangpahrang sin ah an ap lai i Win le Zaw nih biaceihnak thar an hmuh nakhnga nawlnak an tuah lai.

Win le Zaw tiah a tawinak in auhmi Ko Win Zaw Tun le Ko Zaw Lin cu aluancia September 2014 ah Thailand ram, Koh Tao tikulh ah British nungak tlangval an thah hna timi sualphawtnak in December 2015 ah thihdan pek an rak si.

Nawlnak an tuah nain August 29 ah Thai Supreme Court nih thihdan thotho a pek hna caah Thai siangpahrang sin lawng ah nawlnak tuah khawh a si i, ni 60 chung ah nawlnak tuah ding in timhtuahnak an ngei.

Latest News