Cawbuk Khuabawi Phuah Ding in Report Kong ah Khuabawi Pumpak Fianternak Tlamtling

| The Chin Journal | Hakha, Chin State

Cawbuk khuabawi a rian in dihter ding in report an tuahmi kong he pehtlai in Cawbuk khuabawi a tuan liomi Pu Tan Lwin Oo nih fianternak a tuah i, minung 7 nih mi an hlen hna i an ka report hi a si, tiah a langhter.

A tanglei ca hi khuabawi Pu Tan Lwin Oo nih a chimmi an si hna:

“Cawbuk hi Leisen le Cawbuk tiah kan i then caah hin 2018 thimnak kan tuah lecangka, In-Charge kan i pek hlan hrimhrim in Leisen lei nih uk kan duh lo kan dinhter than lai tiah an timi thawng hi ka theih cang.”

“An ka duh lonak aruang cu kei cu Pyidawtar mi ka si i Cawbuk ah aa thialmi ka si a si. Cun a pahnihnak cu Leisen nih uk an duh lo ruang ah a si. Cun, a pathumnak cu miphun thleidannak ruang ah a si.”

“Cucahcun, September 29, 2018 ah a voi khatnak an rak ka report. Cu lio ah cun mithi min le ramdang ah a um cangmi hna i an min tam ngai an lak i, min an thut. Tii kong ah le lam kong ah tiah an hlen hna i min an thuter hna.”

Cun, “Hlenthawi in report an in tuah a si ahcun tazacuai hna tiah khuanu khuapa le Hakha uktu nih ca an ka thlakpiak.” (A tang i ca hi a si. Hakha penguk zung nih “Lih in an in report a si ahcun tazacuai hna” tiah Cawbuk khuabawi sin ah calehnak an pek).



“Asinain, dawtu le upa hna nih an ka chimhrin cawnpiak caah kaa tul than. Cun, July 16, 2020 zeihmanh a tuah lo, mipi meeting a kan au lo tiah an ka report than. Cucaah, khuanu khuapa, khuabawi pa, innhra uktu khuabawite le mipi cheukhat nih mipi meeting kan tuahnak kong le sang thanchonak kan tuahmi pawl chinchiahnak record he kan el ve hna.”

“Cun August 4, 2020 ah innhmun a zuar, a hlen hna tiah an ka report than. Minung 230 nih min an thut. Hi minthut he pehtleih hin chim ka duhmi cu min a thumi pawl hi inn 230 tiah an ti nain a inn in a si lo, minung (milu) in an si i inn khat ah minung pathum pali an thutter hna. Khuabawi thimfung thlak0nak ah tiah an hlen hna i, min an thutter hna.”

“Cun nan min nan thut lo ahcun kanmah kan tuan tik ah nan herhmi catlap (ထောက်ခံစာ) kan in pe hna lai lo tiah an tlerh hna. Cun, innhmun nan ngah lai tiah an ti hna. Micheu cu lam tuah lo ding in duhlo langhternak minthut a si tiah an hlen hna. Cun acheu cu anmah theih lo bak in min an thutpiak hna. Keimah nih bia fiang ka theihmi ah cun minung 200 tluk hi an hlenmi hna, an tlerhmi i, anmah theih loin min an thutpiak hna.”

“Cun, atutan zong ah Pi Ngun Men hi a thi cangmi a si nain reportnak min thutnak ah aa tel ve. A hmatpungttin (ID) ah 09407960 a si. ID deu minung paruk hrawng an um rih. Minthutnak ah mi a hlengtu hna hi minung 7 an si.”

“Cun, innhmun a zuar an ti tikah hin catlap (ထောက်ခံစာ) ka pekmi hna nih Ks. 50,000 hi sang thanchonak ca ah an pek. Mah sang thanchonak tangka an pekmi cu ai zuar tiah an ka merpiakmi a si. A hlen hna an timi tangka hi ka hlenmi hna a si lo; anmah nih sangthanchonak Fund ah an pek/an tunmi a si.”

“Khuabawi rian ka tuan chung ah ka tuahmi pawl cu:

(1) 2018-2019 ah U Thang Hnin Sianginn in Lungtha va tiang tilu (pe 125×3×3)

(2) 2018-2019 ah Nawl Bik (ရေပြွန်) (24×4) ‌ပေ

3. 2018-2019 ah Ngun Hlei Thluai inn pawng (16×10×16) ပေ

4. Hluttaw Fund in 2018-2019 ah Matupi lam in Senthang biakinn pawng (pe 150×6)

5. 2018-2019 ah Matupi lamthen CCU sianginn pawng (pe 12×6) Furlong 2

6. U Leng Mang inn pawng (24×4×4) (ရေပြွန်)

7. 2019-2020 ‌ah Thlaan lamtthen in Middle School sianginn pawng tiang (သင်္ချိုင်းကုန်းလမ်းခွဲမှ အလကျောင်းနား) (pe 350×14) lung phah

8. April 16, 2018 ah Matupi lam chak lam kauh (pe 800) (Khuanu khuapa i bawm in)

9. June 21, 2018 ah U Nep Luai inn in a tang tiang (khuanu khuapa)

10. May 8, 2018 ah innkaang meithahnak ti khohnak ti-inn (Khuanu khuapa i bawm in)

11. May 5, 2018 ah U Tuan Hram inn pawng (ယာယီ) hlei (pe 12×3)(Khuanu khuapa i bawm in)

12. Matupi lampi lammei

13. November 2019 ah lamsul lei vuanci sin bawmhnak halmi ah lammei

14. June 3, 2018 ah Middle School (အလကကျောင်း) thutden caah

15. July 12, 2018 ah Middle School (pe 135×12) cu khuanu khuapa le uknak lei hnatlak in bawmhnak hal mi ah ယာယီကျောင်ခင်းလမ်း hna hi an si, tiah Cawbuk khuabawi nih a langhter.

A cunglei ca hi Khuabawi Pu Tan Lwin Oo pumpak chimmi an si i, The Chin Journal nih a chim ning in kan langhter chinmi a si.

Latest News

News in Burmese