Buthitaung ah Kawl Ralkap Pa nih Va Ngei Cia Nutung Nu Tlaihhrem a Timh Lio ah Khuami Hna nih an Tlaih

| The Chin Journal | Hakha, Chin State

Rakhine ram, Buthitaung pengkulh, Pyin-shii khuate ah Kawl ralkap pakhat nih va ngei cia nutung nu tlaihhrem a timh lio ah an tlaih.

April 7, sml. 1:00 pm hrawng ah Pyin-shii khuami Daw Khine Saw Yin (kum 40) cu a dum chung a um lio ah Kawl ralkap pa a rak phan i tlaihhrem a timh.

“Tuchun suimilam 1:00 hrawng ah a si. Kei hi nifatin dum ah rian ka tuan. Ka dum cu khua he pee 100 hrawng aa hlatnak hmun ah a um. Dum chung ka um lio ah ralkap pakhat cu hau kutka in a rak lut. Vawlei ah a ka bualh pi, a si khawh chung in hau leng ah chuah kaa zuam. Cu lio ah cun aa denhmi bawlung chuihnak keden in ka hmai a ka chuih” tiah Daw Khine Saw Yin nih a chim.

Hau leng a chuah hnu ah Daw Khine Saw Yin nih khuami bawmh a hal hna i ralkap pa cu an tlaih. Cun, 564 Battalion ralkap sakhan ah an va ap.

Hi kong he pehtlai in Buthituang pengkulh Pyithu Hluttaw U Aung Thaung Shwe nih thil sining dikhmaan a sinak kong cu video file le hmanthlak telh in ralkap sakhan ah cun a va ap.

– Narinjara

Latest News