Burmese Python Tiah a Minthangmi British Nu Myanmar Boxing ah aa Thong ve Lai

| The Chin Journal | Hakha, Chin State

Burmese Python tiah a minthangmi Myanmar hritlai British nu ‘Nicola’ cu tu kum Myanmar Boxing ah aa thong ve lai.

Kum 25 minung ‘Nicola’ cu aluancia thla ah World Lethwei Championship he hnatlaknak minthut an tuah i tu kum chung ah a tlawmbik voi 1 cu aa thong ve lai tiah Myanmar Latt-kha-maung Media tuanvo ngeitu pakhat nih a chim.

Myanmar Latt-kha-maung media lutlai Ko Aung Thu nih “Ram chung ah amah weight he aa level mi an um lo ruang ah ramdang mi pakhat he kan thonghter hna lai” tiah a chim.

Burmese Python Nicola cu aa thuatnak kip ah Myanmar thantar aih buin a chuak tawn i teinak a hmu zungzal. Hringtu a nu hi Myanmar hrin a si ruang ah teinak ka hmuh zungzalmi a si tiah BBC interview ah Nicola nih a chim.

“Myanmar thantar aih buin Ring cung ka chuahmi hi chungkhar ciiruang ruang ah a si. Ka nu hi Myanmar hrin a si i ka pu le ka pi zong Myanmar an si. Keimah zong nih Motherland Myanmar hi ka thangthat. Cun, ka min hi ‘Burmese Python’ tiin ka ni-piah nih a ka sak. England ah ka chuak, cucaah British mi ka si. Asinain, ka ciiruang taktak cu Myanmar a si, Myanmar ciikor tiah kaa ti. Myanmar holh belte ka thiam lo” tiah Nicola nih a chim.

Nicola cu Em Legend ah ahmasabik aa rak thong i voi 20 hrawng aa thong cangmi Tuluk nu a rak tei bal. SFS VI nu 4 final puai zong ah WKO British Champion a hmu.

-DVB

Latest News