British Khualtlawng Nu Nih Lamkam Ar an Zuarmi Thlahpiak Dih a Timh Hna Caah an Buai Ngai| Video

| The Chin Journal | Hakha, Chin State

North Africa vawleithen ah a ummi Morocco ram ah British khualtlawng nu nih lamkam ah ar an zuarmi pawl zaangfak tuk an si tiin bawm chung in chuahpiak dih a thimh hna caah ar zuartu pawl buailulh in an um.

British nu cu arbawm cung ah a kai i ar pawl thlah ding in bawm kutka on a timh. Ar zuartu pa nih a kut in a phih chih ve.

“I thawn!” tiah British nu nih ar ngeitu pa cu a awtler lengmang in a raak chih i a kut zong ah a koh.

“Ca nan rel thiam lo ma. Fimnak a cawng lomi maw nan si?” tiah Moroccan ar zuartu pawl cu a volhpamh len hna.

Sihmanhsehlaw, Moroccan pawl nih lungsau ngaiin an intuarpiak. A rauh hlan ah palik an rak phan i hi British khuatlawng nu hi mahka lamkam ar zuarnak hmun in hin an thawl.

Mi tampi nih capo seihnak an hman bang in micheu nih, “Mi ram phak ah cun an nunphung upatpiak awk a si,” tiah an ti.

“Ziah mah ar pawl hi an zuarmi a si lo maw. Mah nu nih hin a cawk dih i amah tein a thlah ko lo,” tiah a titu zong an um ve.

Minu pakhat nih cun, “Mi ramdang ah na kal riangmang i ar an zuarmi cu thlahpiak na timh hna. Ar zuartu pa kut zong na koh chap hoi. An lung a sau tuk caah an in let duh lo i a si kha,” tiah a ti ve.

Latest News