/

Biden nih Teinak a Hmuh Caah Vawleicung Hruaitu Pawl an i Lawm

The Chin Journal | Hakha | Chin State
Joe Biden le vice president a ttuan dingmi Kamala Harris (Photo by Olivier DOULIERY / AFP) (Photo by OLIVIER DOULIERY/AFP via Getty Images)

Democrat Joe Biden nih Donald Trump cu Electoral Vote 270 lengpi in a tei caah vawleicung ramhruaitu pawl zong an i lawm i “Welcome Back America” tiah an conglawmh.

UK Prime Minister Borris Johson nih Joe Biden teinak cung ah lawmhnak bia a chim i “US cu kan ca ah abiapi bikmi kan hawikom ram a si. Hmailei ah vawleicung khuati kong ah siseh, chawlehthal kong zong ah siseh, cun runvennak kong zong ah siseh, naihniam tein rianttuan tti ding in kan i ruahchan,” tiah a chim.

Canada Prime Minister Justin Theodor nih, “Congratulations Joe Biden and Kamala Harris,” tiah a ttial i, “US le Canada cu naihniam taktak in rian a ttuan tti zungzalmi kan si. Hmailei ah rianttuan tti ding in kaa ruahchan ko,” tiah a peh.

Irish Prime Minister Micheál Martin nih, “US President thar Joe Biden sin ah lawmhnak ka langhter. Biden hi ahlan zong ah kan hawikom ttha a si. Hmailei ah rian ttuan tti ding in le kan ramte a phak tik ah i ton ding in kaa ruahchan ko,” tiah a langhter.

Paris khuabawi Anne Hidalgo nih, “Welcome Back America” tiah tawifiang in Biden nih teinak a hmuhmi cung ah lawmhnak a langhter.

German Foreign Affairs Committee chairman Norbert Röttgen nih, “Kan i lawmhnak a sang tuk hringhran. US le Germany karlak pehtlaihnak a thar in fehternak caan kan hmu tthan cang,” tiah a chim.

London khuabawi Sadiq Khan nih, “Biden le Harris kan lawmhpi hna. Ramri vanpang si loin i pehtlaihnak donhlei sak caan a cu cang,” tiah a chim.

US rampi President thimnak nih US rammi lawng si loin vawleicung mipi cu ni 4 chung thindomh in a chiah ve hna i, atu ah cun teitu ahodah a si timi a hun fiang ngaingai cang.

Joe Biden nih a tei caah amah he ttuan tti ding US vice president cu Kamala Harris a si ve lai. Atutan hi US tuanbia ah Minak nu nih White House ah vice president a voi khatnak bik a ttuan zong a si lai.

Joe Biden nih, “American mipi hna, kan rampi hruai ding in nan ka thimmi cung ah kaa lawm tuk hringhran. Kan hmailei ah aa suangmi rian hi a har ko lai. Asinain, hihi kan kamh hna: Vote nan ka pek zong, pek lo zong ah, American rammi nan zapi ca ah President ka si lai. Ka cung ah zumhnak nan ngeihmi hi nunpi kaa zuam lai,” tiah Facebook ah a ttial.

Donald Trump nih, “Biden nih lung rang tuk in ahmaan loin teitu ka si a ti,” tiah a soisel. Cun, Facebook ah “Vote tam tuk in keimah nih ka tei ko” tiah a ttial chap.

“Keimah nih ka tei” tiah Trump nih a postmi ca tang ah Facebook nih, “Joe Biden hi 2020 US Presidential Election teitu a si tiah an timi a si,” tiah chinchiahnak ca a benhpiak.

[Cherhchan: CNN, Fox News, Forbe]

© The Chin Journal thawngpang Website dang ah nan tleng hrimhrim lai lo.

HNUBIK THAWNGPANG


ELECTION


COVID-19