Biden nih a Tei an Tinak Arizona ah Vote Rel Ding 450,000 Hrawng a Taang Rih

| The Chin Journal | Hakha, Chin State

Joe Biden nih Donald Trump a tei tiah US ramchung Media cheukhat nih an tinak Arizona ramkulh chung ah vote rel chap ding 450,000 hrawng a taang rih, tiah Arizona Secretary of State Katie Hobbs nih CNN sin ah a chim.

Cacawn nili ni (US caan) chun tiang ah Arizona ah Biden nih Trump cu vote 70,000 hrawng in a thlau.

Asinain, vote rel chap awk 450,000 hrawng a taan rih tik ah Trump ca ah ruahchannak a um tiah CNN nih a langhter.

Fox News nih a Tuahmi US Election Result

Cun, Nevada ah Biden nih Trump cu vote 12,000 hrawng in a lonh. Asinain, Nevada ah hin vote rel awk 25% hrawng a taang rih.

Nevada ramkulh chung vote an thlakmi pawl cu vote an relnak hmun ah a phak a tlai lai caah November 10 tiangpi khi vote rel a rau kho.

Trump nih vote 100,000 fai in Biden a thlau nak Pennsylvania ah vote rel awk 3o0,000 hrawng a taang rih.

The New York Times nih a tuahmi US Election Result

Cun, Georgia ah Biden vote a kai chin thluahmah. Trump nih 13,000 hrawng lawng in a thlau cang. Asinain, relchap awk tam vote a taang ti lo.

North Carolina ah Trump nih Biden cu 75,000 leng in a lonh. Asinain, vote relnak hmun ah a phan tthan dingmi vote 100,000 leng a taang i, November 12 hlan ah cu vote pawl cu an phan lai tiah an ruahdamh.

CNN nih a tuahmi US Election Result

Nevada le North Carolina ah vote relnak hmun ah a phan rih lomi vote an um len rih caah atutan US President thimnak result hi 2016 bantuk in tuante in theih khawh dawh a si lo.

[Cherchchan: CNN]

Latest News

News in Burmese