Biachia in CDF a Zuamcawhtu SAC Ralhrang Mindat-Matupi Kar ah Thi

| The Chin Journal | Hakha, Chin State

Aluancia April thla chung ah Facebook ah biachiakha in CDF pawl a zuamcawhtu SAC ralhrang pa Yel Lin Aung cu July 30 ah a cangmi Mindat-Matupi karlak kahdohnak ah a thi, tiah CDM a tuahmi Myanmar ralbawi fanu nih a chim.

Yel Lin Aung hi Sagaing ramtthen, Katha ah hmun a khuarmi Kha Ma Ya (304) ah ralkap a ttuanmi a si i, Matupi ah a phanmi SAC ralhrang bu ah aa telmi a si.

CDF pawl biachiakha in a zuamcawhtu SAC ralhrang Yel Lin Aung cu Mindat-Matupi kar kahdohnak ah a thi.

June thla chung zong ah khan Yel Lin Aung le a dang SAC ralhrang pawl cu Hakha ah an rak phan i caan zeimawzat an caam hna.

Yel Lin Aung nih July 19 ah a donghnak bik Facebook ah a ca ttial. Cu a ca ah cun, “Kawlram chung kaa ziak bikmi khua pakhat lak ah Matupi zong aa tel cang,” tiah a ttial.

Mah hlan April thla ah khan Facebook Commend pakhat ah, “Nan Lai meithal he cun rak chuak uh. Ka z**g he nan i do lai,” tiah biachakha ngaiin CDF pawl a zuamcawh hna.

Yel Lin Aung nih a Facebook Commend ah biachiakha in CDF zuamcawhnak ca a ttialmi.

July 30 ah a cangmi Mindat-Matupi karlak mengtung no. 73 zawn i kahdohnak ah SAC ralhrang bawi Leut. Col. Zaw Zaw Soe telh in ralhrang 10 an thi, tiah CDF nih thawngpang an chuah.

Mindat-Matupi kar ah CDF le CNF kut in a thimi SAC ralhrang Yel Lin Aung

Hi a thimi lak ah hin a cunglei i Yel Lin Aung zong hi aa tel. CDM a tuahmi ralbawi fanu lawng si loin Mindat mipi group pakhat zong nih Yel Lin Aung a thihnak kong cu an fehter.

Mindat group pakhat nih, “Matupi khua kaa ziak ngai cang a timi Yel Lin Aung cu Mindat le Matupi karlak ah non ah aa chuah cang,” tiah an ttial.

Yel Lin Aung i a hawipa SAC ralkap Si Thu zong nih, “RIP. Thla 3 hrawng lawng raldoh a cawngmi hna kut in na thih cu na paamhmai tuk ee,” tiah ngaichiatnak ca a ttial ve.

Latest News

News in Burmese