Aung San Milem Phun Kan Duh Lo Tiah HCSN Nih Vote Lak in Biachahnak a Tuah

| The Chin Journal | Hakha, Chin State

Hakha khua ah Gen. Aung San milem phun kan duh lo tiin Hakha Civil Society Network (HCSN) nih vote laknak in biachahnak a tuah, tiah thawng kan theih.

HCSN chungtel zatlangbu hna in aiawhtu minung 29 cu September 28 ah Hakha khua ah tonpumhnak an ngei i a cunglei bantuk in biachahnak an ngeih hi a si.

HCSN Coordinator Salai Thawng Cung Nung nih, “Meeting a kaimi 29 kan si. Vote laknak kan tuah i Aung San milem phun a duhmi minung 8, a duhlomi 13, vote a thla lomi 2 le vote lak hlan ah a tin chungmi minung pali an si i Chairman pahnih zong vote thlak a si lo,” tiah a chim.

“Meeting a kaimi 29 lak ah Organization awawhtu minung 5 an si i, a dang cu sang le veng cio in upa le bochanmi pumpak in sawmmi hna hi tam deuh cu an si. Cun, HCSN in minung tlawmpal kan i tel,” tiah a chim chap.

Hakha khua ah NLD cozah nih phun a timhmi ting 200 MMK man Gen Aung San dar milem cu Hakha khua ah a phan cang i Chin ramkullh cozah zung ah fim chung a si.

Gen Aung San milem lawng si loin Panglong hnatlaknak ah Aung San he min a thumi Chinmi kan pale pathum Pu Hlur Hmung, Pu Thawng Za Khup le Pu Kio Mang hna i milem zong phun chih ding atlangpi in hnatlaknak kan ngei, tiah Hakha Sipin Committee Chairman Pu Ngun Vung nih September 20 ah The Chin Journal ah a rak chim.

Milem phunak hmunhma tlamtling in ngeih a si rih lo ruang ah atu tiang Aung San milem cu phun kho loin Chin ramkulh Hluttaw zung ah an fim chung, tiah theih a si.

Latest News