Aung La nih Vera a Tei Lai tiah MMA Vuak Thiam Hna nih an Zumh

| The Chin Journal | Hakha, Chin State

October 13, Japan ram, Tokyo khua ah tuah dingmi One Championship: Century timi MMA vuak zuamnak puai pical bik pakhat ah Aung La le Brandon Vera an i thong lai.

Philippines rammi MMA thongh thiam Vera nih Aung La cu a challenge bang in Aung La zong nih atulio aa tlaihmi Light Heavyweight Title a sungh lo nakhnga aa zuam ve lai.

Atulio MMA thong thiam pawl nih an ruahdamh chung ning ah Aung La nih hin Vera hi a tei te lai tiah an ti.

Martin Nguyen

One Championship Featherweight champion Martin Nguyen nih, “Vera hi i thonghnak lei ah hmuhtonmi tampi a ngeimi a si ko. Ka hawikom zong a si. Asinain, Aung La le Vera karlak an sining zoh tik ah Aung La hi a training zong a tha deuh. Cun, Aung La cu kut thongh le ke hman a thiam pin ah tei duhnak lungput a ngei tukmi a si. Atutan puai ah tei hrimhrim ding in a lung aa thlek fawn. Aung La nih Vera hi a tei lai tiin kei ka ruah ko,” tiah a chim.

Amir Khan

One Championship ah Knock Out in mi a tei biktu Singapore rammi Amir Khan nih, “Ahodah a tei lai ti cu chimchung a har ko. Asinain, kei ka hmuhning ah cun Aung La hi Vera nakin vuak thiam lei ah a tha deuh tuk. Aung La cu a cawlcangh zong a tha. Training zong fak piin a tuah fawn. Round 3 asiloah Round 4 nak hrawng ah Aung La nih Vera hi a tei lai tiin ka zumh,” tiah a chim ve.

Aung La a challenge tu Vera hi kum 41 a si cang. Atulio MMA ah Heavyweight Title aa tlaihmi a si i, MMA ah voi 24 a rak i thong i voi 16 teinak a hmu.

Aung La he aa thua dingmi Brandon Vera

Vera nih, “Atulio hi Aung La a minthan lingcang bak a si ko. Asinain, kei zong Title pahnih aa tlaihmi Champion si ka duh ve. Light Heavyweight aa tlaihmi hna hi challenge ding in duhnak ka rak ngeih rengrengmi a si,” tiah a chim.

Aung La nih, “Atutan puai ah hin hngawngreh kuat hmang loin kee tu in phomh khawh kaa zuam lai. Amah (Vera) zong aa vuak tik ah hin neih tein a um tawn lo i a kee a hman ngai tawn. Kei nih cun amah hi vun neih duahmah in thongh kaa zuam ve lai. A lang in a rak ka chuihmi pawl i kham khawh kaa zuam ve lai,” tiah a chim.

Latest News