Aung La Ca ah Lehrul Cham Ding in “Dave Leduc” US Ram ah aa Thong Lai

| The Chin Journal | Hakha, Chin State

Aung La ca ah lehrul ka cham lai tiah a titu Kawl lethwei fighter Dave Leduc cu aralaimi November 7 ah US ah aa thong lai, tiah theih a si.

Dave Leduc cu US rammi Cyrus Washington he a voi hnihnak an i thong lai.

Cyrus Washington le Dave Leduc hi 2017 ah Yangon ah rak tuahmi World Lethwei Championship ah an rak i thong i an i tluk.

Cu lio ah cun Dave Leduc nih a rak tei deuh ngaingai nain tho kho lo lak in a rak thong kho lo. Cucaah, i tluk in a rak dong.

Tu thla chung ah Cyrus cu bia an hal tik ah, “Dave he khoika paoh ah i thongh tthan ding in ready ka si ko. Lethwei thongh zuamnak ah keimah dahtilo Dave hi a tei khotu an um lai lo. Cucaah chuah hnawh tthan ding in ka duh bak ko,” tiah a chim.

Dave le Cyrus a voi 2nk i thonghnak puai cu US ram Wyoming ramkulh, Cheyenne khua ah November 7 ah tuah a si lai.

Dave nih Cyrus hi tei i Aung La ca ah lehrul cham le Myanmar ram limhaang cawithlir ding in a vun i hrocer hi a si.

“Ka upa Aung La ca ah aralaimi zarh chung ah lehrul ka cham lai. Myanmar ram limhaang ca ah teinak ka hmu hrimhrim lai,” tiah Dave nih Kawlca in a Facebook ah a rak ttial.

Kum 28 lawng a si rihmi Dave Leduc hi Canada rammi a si i, UAE ram Dubai khuapi ah khua a sami a si.

Kawl thongh ningcang (Lethwei) ttha tein a cawngmi a si i, Myanmar ram min keng in le Canada ram min keng in aa thong tawnmi a si.

World Lethwei Championship (WLC) ah a rak i thong i Cruiserweight World Championship taisawm zong a co. Atu tiang ah cu Championship taisawm cu a chut khotu an um rih lo.

Cu lawng si loin Openweight World Lethwei Champoinship thongh zuamnak zong ah a tei khotu atu tiang an chuak rih lo i “The King of Lethwei” (Lethwei Siangpahrang) tiah thangtthatnak minhleng an pekmi pa a si.

Latest News

News in Burmese