August Lawng ah Taang-10 Result a Chuak Kho Lai

| The Chin Journal | Hakha, Chin State

August thla chung lawng ah 2019-2020 cawcawn kum i taang-10 result a chuak kho lai, tiah Myanmar fimcawnnak zung in Deputy Director Dr. Tin Mawng Win nih a chim.

“Taang-10 result chuah ding in Code pawl ttial hram kan thawk cang. Mah dih hin Answer Paper pawl check a si rih lai. June 5 ah Answer Paper check cu kan thawk lai. Cu dih cun Answer Paper cung i Code pawl kan hawh tthan lai i Mark cazin timhtuahnak rian he cun a tlawm bik thla hnih kan rau kho. Cucaah, atu i kan ruahdamh ning ah cun August thla hrawng lawng ah result hi a chuak kho lai,” tiah Dr. Tin Maung Win nih Sandaw Ching thawngzamhnak ah a chim.

COVID-19 ruang ah taang-10 Answer Paper pawl zong check khawh loin thla hnih chung hrawng an um i, thla 2 caan vun lak tthan i tlamtlinh ding in timhtuah a hun si hi a si.

June 5 ah taang-10 caminpuai Answer Paper pawl checknak rian thawk ding a si caah ttuanvo pekmi saya/mate nih June 3 a donghnak bik chia in mahle ttuanvo lak nakding hmunhma cio ah thawngthanh ding zong in May 19 ah khan Myanmar ram fimcawnnak zung nih thawng a thanh cang.

Kan hnu March 11 ah Myanmar ramchung taang-10 caminpuai phit a si i, Myanmar ramchung ah taang-10 a phimi 910,000 fai an si. A dang siangngakchia 61,000 leng caminpuai phit loin an bau.

March 23 ah Myanmar ram ah COVID-19 zawtnak a voi khatnak bik an hmuh i cu caan thawk cu fimcawnnak sianginn le sianghleirun pawl zong khar dih an si.

Latest News