Atulio Myanmar ah Alar Ngaimi Lamkam Chiahmi Alak Eidin Kuang

| The Chin Journal | Hakha, Chin State

June thla thawk in Myanmar ram ah khulrang tuk in a hun larmi cu lamkam ah bizu fate an ser i eidin phunphun le tithawl pawl an chiah i a duhmi alak in i lak i ei khawhmi Food Box timite hi a si.

Yangon ramthen peng pathum hmun tampi ah chiah a si bang in Myanmar ram hmun dangdang zong ah an vun i cawn cio i Kalaymyo zong ah an chiah ve cang.

Yangon ah an chiahmi pawl tu cu minute tlawmpal a ruah ah an dih colh. Thal rawltam in a rak vakvaimi an rak tam deuh ko rua.

Yangon ah chiahmi Food Box hi KMS Construction Company nih an hlutmi a si i, “Atu bantuk in tuah ding hi kan rak i tinhnak a sau ngai cang. Kanmah zong thluachuah kan hmu lai kan ti i kan tuah hi a si. Zarh khat ah ni thum chung hrawng hi eidin tirawl kan chiahpiak tawn hna lai,” tiah tuanvo ngeitu nih Eleven News ah a chim.

Yangon Food Box an chiahnak pawng ah dawr a tuahmi nu nih, “Chun sml. 2:00 ah khan eidin tirawl pawl cu an rak chiah. Asinain, minute 2-chung ah a dih colh. Aa rak laktu pawl nih changreu hna pakhat lawng i lak loin pali panga hna an i lak. Siikaan an ngei lo tuk. Cucaah, a dih colh hi a si,” tiah a chim.

Myanmar ram ah atu bantuk in alak in eidin tirawl i hmuh khawhnak Food Box hi a voi khatnak bik an tuah a si.

Latest News