Atulio Kawlram ah Nawlngeihnak Sang Bik a Ngeimi Ralbawi Pawl

| The Chin Journal | Hakha, Chin State

February 1 ah Myanmar ralkap nih kan rampi uknak an ramh hnu ah atulio kan ram uknak a suamtu cunglei bik (Nawlngei Bik) minung pali in kan rak langhter lai.

Senior General Min Aung Hlaing (Commander in Chief)

Atulio ah Kawlram chung ah nawlngeihnak sang bik a ngei tiah timi cu Myanmar ralkap bawizik Senior General Min Aung Hlaing (kum 64) hi a si.

February 1, 2021 i rampi nawlngeihnak chuhnak ah biapi bik ttuanvo ngeitu a si i, nawlngeihnak a ramh dih hnu ah ramkomh minister 11 zong a thim hna.

2019 ah US nih Min Aung Hlaing cu dantatnak a rak pek. Min Aung Hlaing he aa pehtlaimi US ramchung rianttuannak vialte US nih a ngolter dih pin ah US rammi ahohmanh amah he pehtlai in rianttuan lo ding in a kham. Cun, 2020 thawk in UK nih sipuazi lei dantatnak a pek ve.

Atulio ah cun amah hi Kawlrampi hruainak ah chaak tlaitu (State Leader) a si.

President Myint Swe (Lieutenant General)

Ralbawi tthing a simi atulio caan karlak President Myint Shwe (kum 69) cu NLD cozah chan ah vice-president (1) rian a tlaimi a si i, ralkap nih February 1 ah caan karlak President rian tlai ding in rian an khinh.

2015 thimnak ah USDP in a rak i cuh i teinak a hmuh hnu ah Yangon ramtthen Chief Minister rian tlai ding in a min an rak tar vemi a si.

Anih hi Kawl ralkap sianginn chuak bakte a si. 1971–2010 karlak tiang ralkap a ttuan i, Lieutenant General rank tiang a phan.

Soe Htut (Lieutenant General)

Lieutenant General Soe Htut (kum 60) cu February 1 ah Ministry of Home Affairs (ပြည်ထဲရေး၀န်ကြီးဌာန) ah vuanci ttuan ding in rian an khinh tharmi a si.

Ralkap nih uknak a lak hlan ah khan Lieutenant General Kyaw Swe nih Home Affairs hi a tlaih nain ralkap nih uknak a lak hnu ah Kyaw Swe hmunhma ah Soe Htut hi rian an khinh.

Soe Htut cu ralbawi Brigadier General Lun Maung fapa a si i, ralkap sianginn in a dihmi a si ve. Home Affiars luzik rian an khinh hlan ah Military Intelligence (Thoh-Hlan-Yi) ah lutlai a si.

Anih hi US nih dantatmi cazin ah aa tel lo nain Rohingya kong ah EU nih sipuazi lei datatnak a pek vemi a si.

Soe Htut nih a tlaihmi Home Affairs hi Kawlram chung uknak zung (Administrative Departments) vialte, Meithat zung vialte, Thonginn vialte, Palik rian vialte le Ramri humhimnak rian vialte a tlai dihtu a si ca ah Kawlram chung ah power ngan bik a ngeimi Ministry a si.

Mya Tun Oo (General)

General Mya Tun Oo (kum 59) cu February 1 thawk in Ministry of Defense (ကာကွယ်ရေး၀န်ကြီးဌာန) ah vuanci rian pek a si.

1980 thawk in ralkap rian a rak ttuan i 2016 ah Myanmar ralkap, Navy le Air Force ah Chief of Staff rian a tlai.

Ministry of Defense hi NLD chan ah cun Lieutenant General Sein Win nih a tlaih nain atu ah Mya Tun Oo hi rian an pek.

Mya Tun Oo cu Rohingya pawl thahnawnnak ralkap Campaign ah ttuanvo ngeitu bik a si tiah an ti i, ramleng ah a minchia ngaimi a si.

A cunglei minung pali leng ah Daw Aung San Suh Kyi nih a rak tlaihmi Ramleng Vuanci hmunhma zong hi ralkap kum 30 hrawng a rak ttuan balmi Wunna Maung Lwin (kum 68) an tlaihter.

Asinain, NLD chan ah nawlngeihnak sang ngaingai a ngeimi State Counselor (Suh Kyi tlaihmi) rian hmunhma hi atulio ah a lawngkaang.

Latest News

News in Burmese