An Ci Mit Dengmi Ramsa Hna Kilvengtu Palai ah WWF Nih Aung La Rian an Pek

| The Chin Journal | Hakha, Chin State

Minung pawl nih an thah hna ruang ah an ci a mit deng cangmi ramsa hna kilvengtu Ambassador ah World Wildlife Fund (WWF) nih Aung La N’Sang cu rian a pek, tiah theih a si.

WWF nih, “Myanmar ram zaanglentecelhnak lei ah a minthang bikmi Aung La N’Sang cu WWF Ambassador rian kan pek. Aung La hi amah pumpak hrimhrim zong Myanmar ramchung i ramsa hna kong ah kilkawi duhnak lungput a ngeimi a si. WWF nih a ci mit dengmi ramsa hna kilven ding timi Campaign hi November 2017 in khan kan rak thok. Myanmar WWF Ambassador ah Aung La nih a kan tuanpiak lai caah kan i lawm tuk hringhran,” tiah thawngthahnak zong an tuah.

Aung La nih, “Cihmih a tong dengmi kan ramchung ramsa pawl kilven le ramsa pawl thahnawnnak an tuahmi dohdal ding rian hi kan lungthin nih a duh taktakmi zong a si,” tiah a chim ve.

“Tangka kawlnak ah ramsa thah an ton lengmang tik ah ramsa tampi an ci a mit kho. Abikin, Myanmar ah Vui hi an ci a mit te kho,” tiah a chim chap.

Aung La hi Deceber 2018 zong ah khan Myanmar’s Ministry of Hotels and Tourism nih Ambassador rian a rak khinhmi a si.

Aung La cu aralaimi October 13, Japan ram ah Brandon Vera he i thongh ding in timhtuahnak zong a ngei.

-One Championship

Latest News