Amir Khan He i Thongh Lo Ding Phun in Pacquiao Nih a Chim

| The Chin Journal | Hakha, Chin State

Tukum November thla chung ah British boxing champion Amir Khan le Manny Pacquiao an i thong lai tiah thawngpang a leng nain Pacquiao nih Amir Khan he i thongh lo ding phun in bialehnak a tuah.

Amir Khan hi Pacquiao he i thongh a duh ngaingaimi a si. Pacquiao le Thurman an i thongh hlan ah khan Amir Khan nih, “Novermber 8 ah Pacquiao he Saudi Arabia ah i thongh ding in minsen kan thut cang,” tiah a rak chim.

Asinain, Pacquiao nih Thurman an tei hnu ah thawnglatu pawl nih Pacquiao cu bia an hal tikah, “Atukum hi cu Philippines ah ka kir lai i MP rian ka tuan ko lai. Hmai kum tu ah voi khat kaa thong than te kho,” tiah a leh hna.

Hmai kum ah i thong ding in timhnak Pacquiao nih a ngei pah ko nain Amir Khan he i thongh ding cu si dawh a si lo.

Tukum September ah Errol Spence Jr le Shawn Porter hi Welterweight Champion i cuh in LA ah an i thong lai. Hi hna pahnih lak i aa teimi he i thongh hi Pacquiao nih duh sehlaw a dawh, tiah an ruah.

Pacquiao zong nih, “Errol Spence Jr le Shawn Porter puai zoh ah ka kal te lai,” tiah a chim ve.

A tlangpi in langhter ah cun Amir Khan he i thongh ding cu Pacquiao nih a lung ah a chia deuh rua lo.

Cun, tukum chung cu i thongh ti lo ding in Pacquiao nih a chim fawn caah Amir Khan pumpak nih November 8 ah Pacquiao he kan i thong lai a timi hi tlamtlin lo dawhdang a si.

-The Sun, Express

Latest News