Aluancia Kum 700 ah Rak Suaimi Jesuh Hmanthlak $26.6 Million in an Zuar Khawh

| The Chin Journal | Hakha, Chin State

Kum Zabu 13 a donghnak lei ah Italian hmanthlak suai thiam Cimabue nih a rak suaimi Jesuh Khrihfa hmanthlak cu an i ruah lo ning piin $26.6 million in an zuar khawh, tiah theih a si.

June 2019 ah khan lelam (Auction) in thil a zuar tawntu pa nih France ram nichaklei ah a ummi Compiegne khua ah hi Jesuh Khrih hmanthlak hi a rak hmuh.

Compeigne khua ah a ummi kum 90 hrawng tarnu coka vanpang ah hi Jesuh hmanthlak hi an rak tlai i zei ah an rel theng lo.

Acteon Auction House timi lelam in thil a zuartu bu nih Paris ah cu Jesuh hmanthlak cu lelam in an zuar.

A tam bik ah $4.4 million asiloah $6.6 million karlak hrawng hin kan zuar khawh lai tiah an rak ruah nain Paris ah a ummi mirum pakhat (min langhter lomi) nih $26.6 million bak in a cawk i zapi an khuaruah a har cio.

Lelam in Jesuh hmanthlak a zuartu Acteon Auction House nih, “Hi Jesuh hmanthlak zuarnak hin kan hmuhmi a tam u cu hmanthlak a ngeitu tarnu sin ah pek a si lai,” tiah thawng an thanh.

French tarnu coka vanpang ah an hmuhmi Jesuh Khrihfa hmanthlak

Hmanthlak suai lei ah thiamsang a simi pawl nih, “Hi Jesuh hmanthlak hi Cimabue nih 1280 hrawng ah a rak suaimi a si lai. Cauk bantuk in kau khawh ding in sermi thingphel cung ah rak suaimi a si. Cimabue nih Jesuh Khrihfa vailam an tahnak hmanthlak hi cauk bantuk in kau khawhmi thingphel pariat cung ah a rak suai. Atu Jesuh hmanthlak hi cu thingphel pariat cung ah a rak suaimi hna lak ah pakhat a si,” tiah an chim.

Hi hmanthlak hi Jesuh Khrih vailamtah ding in Rome ralkap nih an tlaih i nihsawh ngaiin Rome ralkap le mipi nih an rak tuahto lio kha a si. Cucaah, hmanthlak a suaitu Cimabue zong nih hi hmanthlak hi “Jesuh Khrih Nihsawh a Tong” (Christ Mocked) tiah min a sak.

Cauk bantuk in kau khawhmi thingphel pariat cung ah Cimabue nih a rak suaimi Jesuh vailamtahnak hmanthlak hi atu tiang ah pathum an hmuh cang.

Pahnih cu New York khua i Frick Collection timi ah an fim hna i, zapi zong nih zoh khawh an si. Atutan ta hi a pathumnak an hmuhmi a si i, a dang panga tu cu atu tiang hmuh an si rih lo.

-Fox News

Latest News