AA Tlaihmi Chin Mino Thlah Ding in Halnak an Tuah

| The Chin Journal | Hakha, Chin State

Chin ramkulh, Paletwa peng ah AA hriamtlai nih an rak tlaihmi Chin mino Salai Aung Soe thlah tthan ding in Paletwa zatlang bu KACC le chungkhar nih halnak an tuah, tiah theih a si.

Salai Aung Soe le a hawile pathum cu July 29 ah khan Rakhine ramkulh, Kyaukdaw khua in Paletwa khua lei ah an rak tlung.

Kyaukdaw le Paletwa karlak Ngatharyaing khuate pawng ah AA nih an tlaih hna i Salai Aung Soe a hawile pathum cu an thlah tthan hna.

Asinain, Salai Aung Soe belte hi atu tiang an thlah rih lo. October 29 ah khan Salai Aung Soe an tlaihnak cu thla thum a tling cang i, atu tiang a sining fiangfai in theih a si lo.

Salai Aung Soe chungkhar Pu Ram Hnin nih, “Salai Aung Soe hi amah pumpak sipuazi a tuahmi a si. Mino a si caah mino cawlcanghnak ah aa teltumnak cu a um ve ko lai ta. Asinain, atu bantuk in an tlaihnak aruang hi kan theithiam lo. Inn ah a nulepa lawng an um. A farle zong an lungre a thei ngaingai. Salai Aung Soe hi a ngandamnak zong hawi bantuk in a tthami a si lo. Cucaah, khulrang in rak kan thlahpiak hna sehlaw kan duh ko,” tiah a chim.

Salai Aung Soe AA nih an tlaihmi kong he pehtlai in Paletwa zatlang bu hna nih cathanh chuah in thlah ding in halnak an rak tuah len nain atu tiang ah Salai Aung Soe kong he pehtlai in AA nih chimrelnak zeihmanh an ngeihmi a um lo.

KACC nih cazin aa chiah ning ah 2015 thawk in atu tiang ah AA hriamtlai nih Paletwa peng ah khuami 105 an tlaih cang hna.

Minung 105 chung ah 84 hi AA hriamtlai kut in an luat tthan i a dang a taangmi minung 22 i an sining belte hi atu tiang theihfian a si lo.

[Cherhchan: Khonumthung]

Latest News

News in Burmese