AA nih an Tlaihmi Hna Company Riantuantu Minung 8 Chung ah Chinmi 1 aa Tel Ve

| The Chin Journal | Hakha, Chin State

AA hriamtlai nih an tlaihmi hna Suu-htoo-san Company riantuantu minung 8 chung ah Paletwa peng Leik-kung (A) khuami 1 zong aa tel ve. Rianrang in rak thlah than ding ah chungkhar hna nih nawlnak an tuah.

Paletwa he ming 6 aa hlatnak Leik-kung khuami U Htun Lin Aung (34) hi Paletwa-Mizoram pehtlaihnak mawtaw lam cotu Suu-htoo-san Comapany ah lam cawhnak seh a mongmi a si. Ralkap inspector he zeihmanh pehtlaihnak a ngeimi a si lo tiah hringtu a pa U Kyaw Aung nih a chim.

“A hlan ah Hpa-kan ah lam cawhnak seh a mong balmi a si. Nulepa sin a rak tlun hnu ah Suu-htoo-san Company nih minung an herh ruang ah rian a lut. Ralkap inspector he zeihmanh aa pehtlai lo. Paletwa khuami hna zong nih an theih dihmi a si ko, tlaih a ton ruang ah hin hringtu a nu zong rawl ei kho loin a um cang caah dam tein inn a rak tin khawh nakhnga biaktak tein kan nawl hna” tiah U Kyaw Aung nih Khonumthung ah a chim.

Tlaih a tongmi U Htun Lin Aung hi lam cawhnak (tank) mongh in chungkhar pawcawmnak a kawlhawlmi a si.

Myanmar-India ramri, Paletwa-Mizoram pehtlaihnak mawtaw lam a cotu Suu-htoo-san Company riantuantu hna cu an umnak hmun ah AA hriamtlai thazaang 100 hranwg nih an rat hnawh hna i minung 11 an tlaih hna. Hi chung ah hin nu 2 zong an i tel. Nu 2 le pa pakhat belte an thlah than hna.

Hi kong he pehtlai in AA lei chimnak nawlngeitu Khun Thu Kha nih Company riantuantu minung 8 hi a hlan ralkap inspector an si ruang ah kan tlaihmi hna a si tiah Irrawaddy thawngzamh ah a chim.

Kawl ralkap lei thawng dikhmaan thanhtu committee in Brigadier Zaw Min Htun nih AA tlaihmi minung 8 hi ralkap he zeihmanh pehtlaihnak an ngei lo tiah a chim.

“Pehtlaih an ngei lo, lam riantuantu mi sawhsawh an si. Ralkap he naihniam minung zong an si lo” tiah Brigadier Zaw Min Htun nih a chim.

Latest News