AA: Chinmi Kan Tlaih Hna a Si Lo, Kan Sin ah an Rak i Dor Bia a Si

| The Chin Journal | Hakha, Chin State

AA hriamtlai nih Paletwa peng khuatemi minung 52 hi kan tlaihmi hna an si lo, anmah tein kan sin ah a rak i dormi an si i kan zohkhenh hna, tiah an chim.

AA chimnak nawlngei Khaing Tuh Kha nih, “Paletwa peng, Kintharlin khuami pawl hi kan tlaihmi hna an si lo; ralzam in an um ruang ah kan bawmh hna i kan zohkhenhmi hna an si,” tiah 7Day News Journal ah a chim.

Paletwa khuatemi pakhat nih, “Mah khuami 52 hi AA nih an tlaih takmi hna an si ko. Minung 54 an rak tlaih hna i minung 2 an zaam kho. A zaam khomi chung ah pakhat cu lungmolmok in atu a um. AA nih an tlaihmi hna chungkhar cazin kan sin ah a um dih ko,” tiah a chim.

“AA nih kan tlaihmi Kawl ralkap le rammi sawhsawh minung 12 lawng an um. Hi hna chung ah hin sualnak a tuah lomi cu kan thlah than ko hna lai. An sual kan hmuhmi hna tu cu caan zeimawzat chung kan hren rih hna lai,” tiah Khaiang Tuh Kha nih a chim chap.

February 2019 ah khan Kintharlin khuami minung 54 cu AA nih an tlaih hna tiah thawngpang a rak leng.

Paletwa Chinmi tampi nih “AA nih an tlaih taktak ko hna. Thla 3 hrawng a rau cang. Atu tiang an konglam kan thei kho lo. A zaam khomi pahnih nih an chim ning ah AA Camp ah rian an tuanter hna an ti,” tiah an chim.

AA nih an tlaih an timi Chinmi 52 nih luatnak an hmuh nakhnga Paletwa zatlangbu hna zong nih halnak an tuah i tlaih a tongmi an chungkharle zong nih kan thlahpiak hna u, tiah halnak an tuah tiah thieh a si.

-7Day News Journal

Latest News

News in Burmese