A Tapa Cawmken in Ei aa Sum Tuknak ah Sizung a Phanmi Nungak| Video

| The Chin Journal | Hakha, Chin State

Midamlo a tapa a cawmken in eidin aa sum tuknak ah sizung tiang a phanmi kum 24 nungak Wu Huayuan tuanbia nih Tuluk ram online a cul i mi tampi nih chawva bawmhnak zong an pek, tiah theih a si.

Wu Huayuan kum 4 a rak si lio ah hringtu a nu nih a rak thihtak hna. Cun, aluancia 2014 ah khan hringtu pa nih hi Lei nunnak in a liamtak hna i thluak lei tlamtlinglo in a ummi a tapa he lawng ngaktah in khua an sa.

Nulepa nih an thihtak hna hnu in Wu Huayuan nih a tapa cawmkennak le zohkhenhnak kong ah nucan pacan dirhmun in tuanvo a lak.

Wu Huayuan nih a ti khawhtawk rian phun kip a ttuannak in thla khat ah Tuluk tangka 300 Yuan (65,000 Kyat) hi a hmu.

Sihmanhsehlaw, a tapa thlopbul nakding ah 5,000 Yuan (Ting 10 MMK) a herh caah Wu Huayuan cu zing rawl le chuncaw ah manfawi changreu lawng a ei i, zanriah ah buh le hmakphek haang lawng a ei tawn.

Ni khat ah Tuluk tangka fang 2 (450 Kyat) hrawng lawng hi eidin ah a hman i a taangmi cu a tapa thlopbulnak ah a khon tawn.

Wu Huayuan

A tapa ca ah atu bantuk in ei aa sum tuk ruang ah caan a hun rauh deuh tik ah a mipum hi Pound 47 lawng a rit. Kum no a si rih nain a muisam zong tar a lo cang. A sam zong an tlong tawn. Cun, vitamin chambau in a um tuk ruang ah zawtfahnak nih a tlunh zungzal.

Asinain, Wu Huayuan hi sii-inn ah panh ballo in a um i manfawi sii tete in a zawt caan ah aa thlop tawn.

“Nulepa nih a kan thihtak cang. Ka tapa telawng hi unau ka ngeihmi a si. Amah nih a ka liamtak chap lai cu ka ruat kho hrim lo. Cucaah, zei dirhmun ka phak hmanh ah lungdong loin kaa zuam ko lai,” tiah Wu Huayuan nih Media Interview ah a chim.

Hi tluk in harsa in khua a sa nain Wu Huayuan nih a chunmang tlamtlin ding in aa zuam peng.

Guizhaou khua i University pakhat Student Loan a hmu i sipuazi lei fimthiamnak a cawng pah. Cathiam a si caah Teaching Assistant ah an hman pah i thla khat ah Yuan 600 sianginn a kai pah in thlahlawh a ei.

Wu Huayuan

Yuan 600 a hmuhmi nih a tapa he cawmken nakding ah zeitilei hmanh in a zawh lo caah innphiat rian le zunput ttawl rian tibantuk a ttuan chap.

Caan saupi tangka aa khon hnu ah a tapa cu sizung ah a chiah khawh i atu ahcun a tapa hi dam in a um cang.

Sihmanhselaw, amah tu cu caan saupi ei i sum in a rak umnak ah vitamin chambau tuk in a um i damlonak fak piin a tlunh hnu ah sizung ah a phan.

Fak tuk in a dam lo caah pe 100 hrawng hmanh hi amah tein a kal kho ti lo. Sibawite nih, “Caan saupi eidin aa sumnak ruang ah vitamin chambau tuk in a rak um. Lung lei damlonak a ngeimi a si i, vitamin chambau in a umnak nih a fahter chinchin. Surgery tuah i thlopbul a hau,” tiah an ti.

Wu Huayuan

Nungak Wu Huayuan thlopbulnak ah hin Tuluk tangka in Yuan 200,000 (Myanmar in Ting 430) hrawng a dih ding a si. Amah tein i thlopbul khawh nakding a lam a um lo.

Asinain, Tuluk online ah a tuanbia an hun tar tik ah Tuluk ramchung mi tampi lung a tongh tuk i bawmhnak tampi an pek thluahmah.

Wu Huayuan nih, “Atu bantuk in bawmhnak tampi a ka petu nan zapi cung ah ka lawm tuk hringhran. Ka tapa zong nih keimah thlopbulnak ca ah bawm kho ding in kaa zuam lai a ka ti caah ka lawm tuk,” tiah a chim.

Wu Huayuan cu thlopbulnak ngeih ding in sizung ah a um lio a si i, mi tampi nih chawva lei in an bawmh bang in “Damnak tlamtling hmu ko seh” “Na lungdong hrim hlah!” tiah thazaang peknak bia phunphun an cah ve.

Note: Hi Wu Huayuan timi Tuluk nute kong hi October 31, 2019 ah Hong Kong thawngzamhnak OI nih a tarlanghtermi a si.

Latest News