Naypyidaw ah Bomb Pauh a Timtu Timi Hriamtlai Bu ah CNF aa Tel Ve

| The Chin Journal | Hakha, Chin State

Myanmar cozah zung bunhnak Naypyidaw ah tlangcungmi hriamtlai pawl nih bomb puahnak tuah an timh tiin Myanmar President zung nih September 16 ah ramchung cozah zung kip ah ralrinnak ca a pek hna, tiah BBC nih September 20 ah a tial.

Bomb puah a timtu tiah puhmi tlangcungmi hriamtlai bu hna lak ah NCA minsen a thumi CNF le KNU zong an hun telh chih ve hna.

Cun, bomb puah a timtu an si tiah puhmi hna lak ah KIA le AA zong an i tel i a dang tlangcungmi hriamtlai bu pakhat zong aa tel le tel lo felfai in checknak an tuah lio a si, tiah BBC nih cun a langhter.

Sihmanhsehlaw, hi kong he pehtlai hin AA chimnak nawlngei Khaing Tuh Kha nih, “Myanmar cozah amah tein tihphang in a um bia a si. Buddhist biaknak holh in chim ahcun an rak tuahmi thil ruang ah atu bantuk in ruahnak an ngeih hi a si kan ti khawh. Midang cung ah namnehnak an rak tuah tuk caah lehrul a kan cham hnga maw tiin tihphang in an um,” tiah a chim.

“A ngaingai ah hi thawngpang hi Myanmar President zung nih a zamh hmasami a si lo. Thawngpang a kan petu zung pakhat a um. Cu zung nih Myanmar President zung ah thawng an thanh ning in President zung zong nih ralrin peknak a tuah chin hi a si,” tiah Kawl ralkap thawngdik zamhtu bu Secretary Lt. Col Zaw Min Oo nih a chim.

Sihmanhsehlaw, hi thawngpang a chuahpi hmasatu zung hi zei bantuk zung dah a si timi fing in an langhter hramhram lo.

-BBC

Latest News