Meithal Kahnak in a Thimi Pa: Kawl Ralkap nih Kanmah Kutneh a Si Lo Tiah an Ti

| The Chin Journal | Hakha, Chin State

Rakhine ram, Mrauk-u peng Baung-duat khua ah Kawl ralkap nih April 13 zaan suimilam 10:00 hnu ah khuami 2 meithal in an kah hna. Minung 1 a thi, a hawipa tu cu hliamhma a tuar tiah tuan deuh thawngzamh nih a langhter.

Hi kong he pehtlai in Kawl ralkap lei nih kanmah kahmi a si lo tiah bia lehnak an tuah. Cun, thawng dikhmaan lo ning in a chimtu Baung-duat khuabawi U Twin Htan taza kan cuai lai tiah an ti.

A thimi pa hi Mrauk-u peng, Baung-duat khuami U Maung Kyaw Sein (kum 62) a si. Cun, hliamhma tuarmi pa tu cu khua dang in Baung-duat khua ah caan karlak a rak tlawngmi a si. A thimi pa he chungkhat an si.

Hi kong he pehtlai in Buang-duat khuami pakhat nih “Hi hna pahnih hi nizaan ah ka inn ah bia an i ruah. Zaan 8:00 hrawng ah meithal thawng voi 3 kan theih. Cu hnu ah cun inn an tin. Zaan 10:00 hnu ah meithal thawng pehzulh in kan theih, cun authawng zong kan theih chap. Palik sin ah thawng kan thanh nain ahohmanh an rak phan lo. Zinglei sml. 3:00 hrawng ah meithal thawng kan theih than. Khuadei hnu ah kan va zoh. Meithal in tleng lak an kah, a dang pakhat tu cu a hlenh lo, Sittway siizung ah an kalpi” tiah a chim.

Meithal kaptu hi Kawl ralkap an si tiah Buang-duat khuami nih an chim. Asinain in ralkap lei thawng dikhmaan thanhtu committee in Secretary a tuan liomi Brigadier Zaw Min Htun nih Kawl ralkap nih hin Baung-duat khua lei ah kahdohnak kan tuahmi a um lo tiah a chim.

-RFA; DVB

Latest News