2020 Thimnak Zong ah NLD ah i Fun Rih Ko Hna U Sih: MP Ni Sui Lian

| The Chin Journal | Hakha, Chin State

NLD party in Pyituh Hluttaw MP a simi Pi Ni Sui Lian nih Myanmar rampi tlamtling remh hmasa a si nakhnga 2020 zong ah hin NLD ah i bung rih ko hna u sih, tiah a langhter.

“Chinmi ka si i Chin Party zong ah i pek ding ka si ko. Sihmanhsehlaw, nihin ni ah ram thlen hi kan duh. Hriamtlai pawl zong nih kum 30 leng hriam an tlai…sihmanhsehlaw, nihin ni tiang ah zeipipa a phi a chuak lo. Cucaah, ralkap uknak in mipi uknak Democracy ram ah kan ser tik ah hi Democracy rampi a kan serpi khotu ding hi cu NLD lawng a si ti hi kei cu ka zumh bak,” tiah MP Pi Ni Sui Lian nih December 6 ah Naypyidaw ah tuahmi The Chin Journal he biaruahnak ah a chim.

Ralkap uknak in Democracy uknak ah Myanmar ram a thleng khotu ding cu NLD lawng a si timi ka zumh ruang ah NLD ah kaa peknak a si ti zong a chim chap.

Cu lawng si loin kum 53 chung a rawkmi Myanmar ram hi kum 2 kum 3 chung ah thlen ding cu a har tuk, tiah a langhter chih.

“Kan ram hi kum 53 chung a rak rawh tik ah a rawhnak hi a ngan tuk. Cozah rian kum 34 ka ttuan tikah kanmah pumpak nih kan tuarmi a rak tam tuk. kum 53 chung a rawkmi kum 2 kum 3 chung ah thlen ding cu a ngah loh…atu hmanh hi kei cu (NLD nih) tam tuk a tuah khawh ka ti. Dotu pawl nih phun dang in an chim ve ko lai. Khakha cu minung phung a si ko…kum 2020 zong hi NLD pi ah hin i fun rih ko hna u sih. Kan ram hi Democracy ah ser ta u sih,” tiah a chim chap.

Latest News