2020 Chung Laitlang ah Motor/Motorcycle Khawndennak in Minung 40 Dengmang an Thi

| The Chin Journal | Hakha, Chin State

2020 chung ah Chin ramkulh chung ah motor/motorcycle khawndennak (Accident) in minung 37 an nunnak a liam, tiah Hakha palik zung in thawng kan theih.

Chin ramkulh huap in 2020 kum khat chung ah motor/motorcycle khawndennak voi 107 a chuak i atu bantuk in khawndennak a chuahnak aruang bik cu zurit ruang ah a si, tiah Hakha palik bawi U Ko Ko Maung (ဒုရဲအုပ်) nih a chim.

“2020 chung ah Chin ramkulh ah Accident voi 107 a cang. Minung 158 an i khawng i a nunnak a liammi minung 37 an si. Atu bantuk in khawndennak a chuah ruang ah sunghzatlaknak an tonmi azapi a man in tuak ahcun ting 2,648 a si. Khawndennak a chuakmi zatuak in 80% hi cu zurit ruang ah a si,” tiah U Ko Ko Maung nih a chim.

Puai tuah in minung tampi i pumhkhawmh caan le Zarhpi Ni ah hin motor/motorcycle khawndennak hi Laitlang ah a tam khun.

Hakha ah 2020 kum khat chung ah motor/motorcycle khawndennak voi 46 a chuak i minung 57 nih hliamhma an tuar pin ah minung 9 an nunnak a liam.

“Atu kum cu COVID-19 zawtnak a um caah kum dang bantuk in lam zulhphung cawnpiaknak kan tuah kho lo. Mipi lei nih theih le zulh a herhmi cu motorcycle cit tik ah luchin ttha tein i chinh ding, rit buin mongh lo ding, license ttha tein i ken hnu ah motor/motorcycle mongh ding a si,” tiah palik bawi U Ko Ko Maung nih a chim.

Hakha khuachung ah cun motor le motorcycle hi suimilam pakhat ah meng 20 rang (20 mph) lawng in mongh onh a si, tiah a chim chap.

Latest News

News in Burmese