2019 Chung ah Vawleicung Khrihfa Biakinn 9,000 Leng Hrawh le Den an Tong

| The Chin Journal | Hakha, Chin State

Tutan zarh cacawn nithum ni ah Open Doors USA nih 2019 chung i vawleicung Khrihfa pawl nih namnehnak an tonmi report a chuah i, 2019 kum khat chung Khrihfa biakinn le Khrihfami hna rian an ttuannak innlo 9,488 hrawh le den an tong, tiah a langhter.

2019 chung ah vawleicung ram 50 ah Khrihfa milu 260 million hi an zumhnak ruang ah hrem, thahnawn le a phunphun in namneh an tong, tiah a langhter chap.

Cu lawng si loin biaceihnak ngaingai tuah loin tlaihmi le thongthlakmi Khrihfa milu hi 2018 nakin 2019 ah a tam deuh–2018 ah khan Khrihfa 2,625 hi tlaihkhih le thongthlak an tong i, 2019 ah cun 3,711 tiang tlaih le thongthlak an tong.

2019 chung ah Khrihfami hna nih hremnak, thongthlaknak, biakinn hrawhpiaknak tibantuk an ton biknak ram cu North Korea hi a si.

North Korea dih in Afghanistan, Somalia, Libya, Pakistan, Eritrea, Sudan, Yemen, Iran le India pawl nih ahnu in an zulh ve.

Tuluk ram zong hi Khrihfami hrem an tonnak bik ram cazin chung i number 27nk ah aa tel ve.

Open Doors USA CEO a simi David Curry nih, “Tuluk ram ah Khrihfa biakinn 5,596 kharpiak an tong,” tiah a chim.

Biaknak lei hremnak le namnehnak he pehtlai in 2020 kum chung ah i ralrin ding le zohfel ding ram 50 cazin zong Open Doors USA nih “World Watch List” tiin a chuah i cu chung ah cun Myanmar ram hi number 19nk ah aa tel ve.

Latest News

News in Burmese