2019 Chung ah CHRO nih Chinmi Ca ah a Tuanmi Rian Pical Hna

| The Chin Journal | Hakha, Chin State

Chin miphunpi huap in rian a ttuanmi bu lak ah theipar ngei in hmual ngei ngaingai rian a ttuan khomi hi Chin Human Rights Organization (CHRO) hi a si, tiah ti u sih law palh a si lai lo.

2019 kum chung hrim ah cun CHRO a rianttuannak kutneh hi a lang khun i, Chinmi nih kan tonmi harnak kip ah thang piin awaan a chuah zungzalmi kan hmuh khawh.

CHRO a hruaitu Director cu Salai Bawi Lian Mang a si i, Yangon khua ah hrambunh in Chin miphun kong ah rian an ttuan cuahmah.

2019 chung ah CHRO nih rian a ttuanmi tampi an um i, cu chung ah cun Chin miphun tuanbia ah chinchiah awktlak rian an ttuanmi phun (4) in kan run langhter:

(1) Chin Refugee Sinak UN nih Thah a Timhmi Kong: India le Malaysia ah a ummi Chin ralzam hna cu ralzam tiin theihpi an si ti lai lo, tiah UNHCR nih biachahnak a rak tuah tik ah vawleicung Chinmi vialte ngaihchia in kan um hna.

UNHCR nih Chinmi ralzam sinak theihpi ti lo ding in biachahnak a tuahmi a let tthan nakhnga CHRO hi fak piin rian a rak ttuan. Chinmi nih kan tonmi thil sining pawl UNHCR nih a theih nakhnga biatak tein rian a rak ttuan i, UNHCR zong nih a biachahmi a rak let tthan.

(2) Myanmar Ram CPC Cazin ah Khumhnak: Vawleicung biaknak lei zalennak a um lonak ram “Country of Particular Concern” (CPC) cazin ah US State Department nih Myanmar cu 2019 in a khumh tthan.

CPC cazin ah Myanmar ram US nih a khumh tthanmi kong cathluan an chuahmi ah CHRO nih Myanmar ramchung (Abikin Chinram) ah biaknak lei zalennak a um lonak kong pawl hlathlainak a tuahmi tampi aa tel. Myanmar ram biaknak lei kong ah US State Department nih CHRO report hi abikin aa cherhchanmi source pakhat si tiah ti khawh a si.

(3) ECOSOC ah Special Consultative Status Hmuhnak: CHRO cu 2019 thawk in United Nations Economic and Social Council (ECOSOC) timi bu ah phungning in cohlan a si cang.

Cozah he pehtlaihnak a ngei lomi bu pawl kha UN rianttuan tti hawi ah a cohlan tik hna ah Consultative Status hi pek an si tawn. Consultative Status hi phun thum ah tthen a si–General Consultative Status, Special Consultative Status le Roster tiin tthen an si i, CHRO hi Special Consultative Status pek a si.

CHRO cu Consultative Status pek a si cang caah New York le Geneva i UN zung pawl ah CHRO member 10 tiang kal in zalong tein chimrel le pehtlaih khawhnak nawl zong an ngei cang.

(4) UNGA le Human Rights Council ah Chin Issue a Phan: Chinmi nih kan tonmi thil sining pawl cu United Nation General Assembly (UNGA) le Human Rights Council ah chuahpimi UN Report le Special Rapportuer’s Report ah telh chih a si ve.

Atulio AA hriamtlai nih an tlaihmi Paletwa khuami Amyotha Hluttaw MP U Hwai Tan kong zong ah CHRO biatak tein a cawlcang i Amnesty International le ASEAN Parliamentarians for Human Rights telh in vawleicung zatlangbu 40 leng nih U Hwai Tan thlah ding in cathanh pawl an chuah.

Latest News