2018-2019 Europe Bawlungchuih Thiambik “Virgil Van Dijk” Nih a Co

| The Chin Journal | Hakha, Chin State

2018-2019 UEFA bawlungchuih thiam bik thimnak August 29 zaan ah Monaco ram ah an tuah i “Virgil Van Dijk” nih a co.

2018-2019 Europe bawlung tual ah anmah le hmunhma cio ah thiam bik tiah thimmi hna cu – Kawlbawh thiam bik ah Liverpool in Alisson Becker; Hnukham thiam bik ah Liverpool thotho in Virgil Van Dijk; Laikal thiam bik ah Barca in Frenkie de Jong; Hmaikal thiam bik Barca in Leo Messi tiin laksawng an co cio hna.

Virgil Van Dijk

2018-2019 nu bawlungchuih thiam bik ah England bawlungchuih thiam orhlei hnukham Lucy Bronze nih a co.

2018-2019 UEFA Europe bawlungchuih thiam bik laksawng cu Liverpool in Virgil Van Dijk nih a co.

Virgil Van Dijk

A thiam bik laksawng lawng si loin atuzan ah Virgil Van Dijk nih hnukham thiam bik laksawng zong a co chih i laksawng phun hnih a lak khawh.

Virgil Van Dijk cu Netherlands rammi a si i Netherlands ram aiawh National Football Team ah aa telmi a si pin ah atulio Liverpool ah a chuih liomi a si.

Atutan UEFA Men’s Player of the Year thimnak i biakhiattu bu chungtel ah UEFA ah aa zuammi Football Team 80 in cawnpiaktu/coach pawl an i tel hna (Champion League in minung 32 le Europa League in minung 48). Cu pin ah UEFA nih a thimmi Journalist 55 zong an telh chih hna, tiah theih a si.

UEFA Palyer of the Year timi laksawng cu 2011 thawk in an rak pekmi a si i, Ballon d’Or tiah theihmi “European Footballer of the Year Award” airawlh khotu ding in an dirhmi a si.

Aruang cu Ballon d’Or cu 2010 thawk in FIFA World Player of the Year laksawng ah an komh ca ah UEFA Player of the Year tiin a dang tein an pek ve hi a si.

2018-2019 FIFA World Player of the Year ca ah Finalist minung 10 zong a dang tein an thim cang hna i aralaimi September 23 ah Italy ram, Milan khua ah laksawng peknak an tuah ve lai, tiah theih a si.

Latest News