2008 Phunghrampi an Fehternak Kum 11 Nihin in a Tling

| The Chin Journal | Hakha, Chin State

Ralkap nih an rak serchuahmi 2008 Phunghrampi fehter ding in mipi vote thlaknak an rak tuahmi cu nihin ni in kum 11 a hun tling cang.

Minung ting 3 hrawng an rak thihnak Nargis thlichia a hran hnu ni 8nk ah thlichia nih a denmi Ayeyawaddy ramthen le Yangon ramthen chung peng cheukhat dahtilo Myanmar ramchung peng 278 ah 2008 phunghrampi fehter ding in mipi vote thlaknak an rak tuah.

Nargis thlichia nih Myanmar rampi a den lio ah rak fehtermi phunghrampi a si ruang ah “Nargis Phunghrampi” ti zong in a autu an um.

Vote thlaknak nawl a ngeimi ramchung milu 98% lak ah 92% nih 2008 Phunghrampi an duh tiah ti a rak si i, mahlio caan i Myanmar ram hruaitu luzik Snr-Gen Tann Swe nih fehternak minsen a rak thut.

Cu lio ah cun NLD Party nih, “Nargis thlichia hrannak ruang ah kan ram nih hi tluk harsatnak a ton lio ah rammi hna i nunnak biapi ah chia loin phunghrampi kong lawng biapi in tawlrel hi thil dawhcah lo ngai a si,” tiah a rak chim.

Sihmanhsehlaw, 2008 Nargis Phunghrampi cu fehter a si i, atu ni hin cun kum 11 a tling cang.

February 2019 ah phunghrampi remhtu committee ser a si i, phungrampi remh ding in Hluttaw ah chuahpi zong a si.

Phunghrampi remh ding in chuahpimi cu ralkap nih an doh nain remh a si nakhnga pehzul in NLD cozah nih a tuan cuahmah rih ko.

Latest News