႔Yangon Lai Khual-Inn Onnak an Tuah Cang, i Thumh a Ngah Cang Lai

| The Chin Journal | Hakha, Chin State

Yangon ramthen, North Dagon peng ah an sakmi Lai Khual-Inn cu lim a si cang bang in October 26 ah onnak zong tlamtling in tuah a si cang.

Hi Lai Khual-Inn hi North Dagon, Anawratha lam le Kungbawng lamton ah a ummi All Chin Society – Yangon (ACSY) hmunhma chung ah sakmi a si i, a herh ning in hman awk ah timhtuahmi a si.

Nu riahnak khaan

ACSY ah Chin miphun tang ah a ummi miphun 20 hrawng i zatlangbu pawl an i tel hna i cu hna cu mahle miphun hoih in Center i sak cio ding in hmunhma pek an si.

Cungdot le tangdot hlatnak hlei

Lai Khual-Inn hi Lai Chiathat Bu (LCB) tawlrelnak in ACSY hmunhma chung ah a pakhatnak bik sakmi le limmi zong  a si.

Hi Lai Khual-Inn saknak ah hin ramchung ramleng Laimi hna nih chawva bawmhnak zong pek cio a si.

Pa riahnak khaan

Dot-3 in sak a si i, a cungbik dot ah meeting/Seminar tibabantuk tuah khawhnak minung 50-100 tlum Hall le riahnak khaan a fami pahnih an um. A cungbik Hall le khaan pahnih hi a man tlawmte lak in hlanh an si lai.

Cun alai dot ah hin Laitlai midamlo, Yangon a rak phanmi hna nih alak tein an riah khawhnak khaan pawl an um i, nu khaan le pa khaan tiin tthen an si. Zunput le tikholhnak tibantuk zong cu khaan ah cun tlamtling tein serpiak dih an si.

Khual riahnak ihkhun

Cun, a tang bik dot ah hin Khual-Inn a hngaktu umnak, minung 50-100 tiang rawl ei khawhnak cabuai pawl an hun i, khual hna nih amah tein rawl an i chumh khawhnak coka zong an tuah.

Hi Lai Khual-Inn ah a rak phanmi Laitlai midamlo hna nih an liam dingmi cu ti man le mei man telawng an si lai.

Zuninn le kholhtawlnak

Yangon sii-inn panh nakding kong ah midamlo hna nih lung vaivuan in an um lo nakhnga Khual-Inn ah Yangon khuachung i sii-zung le sii-khaan Information/address pawl tlamtling tein an tarpiak dih hna lai.

Tuanvo ngeitu zung

LCB Secretary Pu Peng Hu nih, “Atu ah hin khual paruk hrawng in rak i tthumh ding in an booking cia cang. September thlathawh cun riah khawh a si cang lai. Inn a hngaktu ding ah a sokmi zong minung pathum hrawng an um i kan tawlrel lio a si,” tiah a chim.

LCB Khual-Inn ah tthumh a duhmi hna le Hall hlan tibantuk a duhmi hna nih a tanglei ttuanvo ngeitu phone ah hin pehtlaihnak tuah khawh a si.

-Pu Peng Hu – 09795841403 (LCB Secreatary)

-Pu Lian Iap – 09895924486

-Pu Tha Bik David – 09964250221

-Pu Cia Hmung – 09250269768

Latest News