ံHakha Market Cu “Pu Ro Thang Market” Tiah Minbunh Ding in a Fapa Nih a Hal

| The Chin Journal | Hakha, Chin State

An sak lio cuahmahmi Hakha Myoma Market cu hmun a rak ngeitu Pu Ro Thang min bunhpiak i “Pu Ro Thang Market” tiah ti ding in Pu Ro Thang fapa nih Chin ramkulh cozah sin ah halnak ca a tial, tiah theih a si.

Pu Ro Thang cu Myanmar ram luatnak hmuh ding in Mirang cozah a rak doh ruang ah 1943-45 tiang India thonginn ah Mirang cozah nih thong an rak thlakmi a si.

Thonginn a chuah hnu le Myanmar ram luatnak a hmuh hnu Parliament Democracy chan ah Hakha le Thantlang aiawh in Pyituh Hluttaw MP voi hnih tiang a rak tuanmi zong a si.

Cun, U Ro Thang cu 1958-59 tiang Chin miphun kong tawlreltu Parliamentary Secretary a rak tuan i rialdip uktu U Nay Win nih rampi nawlngeihnak a rak lak tik ah Myanmar nih Democracy uknak a hmuh than nakhnga ramtang ah hriamtlaih in a rak zaam ve.

Ramtang ah hriamtlaih in khua a sak lio ah cun atulio Hakha Market an saknak a vawleihmun cu mah lio i Myanmar ram uknak a tlaitu Union Revolutionary Council cozah nih an rak chuh i, phungning vawleihmun ngeitu a sinak catlap (အိမ္ၿခံေျမဂရံ အမွတ္-၂၇၁) zong chuh chih a si.

ေဆာက္လုပ္ဆဲဟားခါးျမိဳ႕မေစ်းေနရာ မႈလေျမကြက္ပိုင္ရွင္ျဖစ္ေသာ ပါလီမန္အတြင္းဝန္ေဟာင္း ဦးရိုထန္း

Atu ah mipi nih kan i ruahchanmi Democracy cozah a hun kai cang i, Pu Ro Thang nih Myanmar ram luatnak le Democracy hmuh nakding ah thisen le thlanti chuah in a cawlcanghnak pawl kha theihpiak in Hakha Market cu “Pu Ro Thang Market” tiin min rak kan bunhpiak u, tiah Pu Ro Thang fapa Pu Neih Ung nih halnak a tuah hi a si.

Hakha sipin nih Pu Ro Thang upat peknak ca ah tiin Hakhathar i innkarlam pakhat cu “Pu Ro Thang Lam” tiah min an sak ko nain khuahriang a si ruang ah cu minpekmi cu rak kan hlihphuahpiak than u, tiah Chin cozah sin halnak ca chung ah Pu Neih Ung nih a langhter chih.

Hakha Market cu Pu Ro Thang Market tiin min bunhpiak khawh a si lo hmanh ah Market chung i dawrkhaan pakhat tal alak in rak kan pe u tiah halnak zong a tuah chih.

Cun, hi Market hmunhma kong ah hmun dang ah a ummi a dang vewleihmun kha liamrulhnak phun in pek cu kan cohlang lai lo tiah U Neih Ung nih cun Chin ramkulh cozah sin ah a pekmi ca chung ah a tial chih.

Latest News