ံHakha Khuasamhnak Chung Hmun Zuar Kong ah Acozah Lei Ziknawhnak Um Cun Fak Piin Dantat Lai

| The Chin Journal | Hakha, Chin State

Hakha khuasamhnak hmunhma chung ah innhmun a rak zuar i ziknawh eihmuarnak a tuahtu ah acozah zung riantuan an i tel a si ahcun fak piin dan kan tat hna lai, tiah Chin ramkulh sipin vuanci U Soe Htet nih a chim.

Cawbuk sang i Hakha khua an samhnak hmunhma ah inn 130 phungning loin an sakmi a um i hi innhmun pawl a rak zorhtu hna chung ah acozah zung riantuan cheukhat an i tel, tiah bia zong a leng.

Acozah zung riantuan pakhatkhat sin ah inn 4-5 tlum a simi hmunpi kha karlak puaisa nih an cawk chin (Asiloah) cu zung riantuan nih cun puaisa kha a zuarter chin tibantuk in thlithup in riantuan a si i, inn khat tlum hmun ah ting 40-50 hrawng in an rak zuar.

Khuasamhnak hmun ah innhmun a ngeimi pawl cu acozah lei nih an hal tik hna ah aho sin in kan cawk timi fiang in chim a um lo i, laksawng ah kan hmuhmi a si tiah an leh tawn hna.

U Soe Htet nih, “Thil sining a thei deuhmi pawl nih a thei lomi hna sin ah puaisa an tuan i hmun an zuar. Hmun cawtu pawl nih le kan cawkmi a si lo; laksawng ah kan hmuhmi a si an ti dih tik ah chimphoih awk ah a har ngaingai. Hi kong ah ziknawh eihmuarnak cozah zug lei nih an tuahmi kan hmuh ahcun dan kan tat hna lai,” tiah a chim.

Hakha khuasamhnak hmun ah inn an sakmi pawl acozah lei nih theh ding in timhtuahnak a ngeihmi kong he pehtlai in August 19 ah Chin ramkulh cozah nih thawngfianhnak zong a tuah.

Thaizing August 20 ah phungning loin inn an sakmi vialte cu acozah nih a timhtuahnak ning in a hrawh hna lai, tiah theih a si.

Latest News